Спорт сонуна
Дмитрий Горохов көҕүлээһининэн “Кыайыы Факела” патриотическай сүүрүү марафона бу сыл муус устар 24 күнүттэн ыам ыйын 11 күнүгэр диэри ыытылынна. Сүүрүү уопсайа 1700 километр усталаах сиринэн, Саратов – Волгоград – Элиста – Ставрополь – Краснодар – Керчь – Симферополь – Севастополь куораттарынан ааста, Аҕа дойду Улуу сэриитигэр Кыайыы 80 сылыгар ананна.
Сүүрүү бөлөҕүн Горохов Дмитрий, СӨ физическэй култуураҕа уонна спортка үтүөлээх үлэһитэ, Үөһээ Дьааҥы улууһун бочуоттаах олохтооҕо, “Кыайыы Факела” бырайыак тэрийээччитэ салайда. Сүүрүүгэ өрөспүүбүлүкэ чэпчэки атлетикаҕа чемпионнара уонна призердара кытыннылар. Ол курдук, Дьокуускайтан Михайлова Айгуль, Егорова Анна, Монастырева Александра, Егорова Яна, Павлова Акулина — араас сылларга Ильмень күөл тула патриотическай сүүрүү, «Полюс холода – Верхоянск”, Тверь – Ржев – Вязьма – Киров уонна Брянск куораттаргапатриотическай сүүрүүлэр кыттыылаахтара; Таатта улууһуттан Доргуева Валентина, марафоҥҥа бэтэрээннэргэ Европа чемпиона уонна Находкин Владимир, Саха сирин норуоттарын спортивнай оонньууларын уоттарын эсафетатын кыттыылааҕа; Сунтаар улууһуттан Пустоляков Геннадий, 2021 сыллаахха Ильмень күөл тула патриотическай сүүрүү, Сунтаар – Байкал – Монголия атынан туур кыттылааҕа уонна Өлүөхүмэ улууһуттан Куприянов Валерий «Полюс холода – Верхоянск” уонна “Полюса холода – Оймякон” сүүрүүлэр кыттыылаахтара бу марафоҥҥа ситиһиилээхтик кыттан кэллилэр.
Василий МОЖУКОВ, СӨ спордун бэтэрээнэ, Покровскай к.