Ыам ыйын 1 күнэ – Күөх Маай, Үлэ, Саас бырааһынньыга. Бу күнү көрсө, үгэс курдук, Покровскай куорат тэрилтэлэрэ, ол иһигэр уопсастыбаннай тэрилтэлэр ырааһырдыы үлэтигэр көхтөөхтүк кытыннылар. Сандал сааспыт чаҕылхай күнэ дьону-сэргэни таһырдьа таһаарда. Куораппыт дьаһалтата, уулуссалары, олорор тиэргэннэри ыраастыырга ыҥырыытын өйөөн, Покровскай куорат эр дьоно, аҕалара тус тэрилтэлэрин субуотунньугун иннинэ бэйэлэрэ көҕүлээн дьону түмтүлэр, ырааһырдыы үлэтигэр кыттарга ыҥыран кэллилэр.
Хаар ууллан уулуссаларга, болуоссакка, Бульварга бөх-сыыс көстөн кэлэн хомунуу-ыраастаныы үлэтэ хайаан да ирдэнэр. Бүгүҥҥү тэрээһиҥҥэ Покровскайдааҕы “Айтыын” колледж студеннара эмиэ кыттыыны ыллылар. Үлэ бырааһынньыгын көрсө эдэр дьоҥҥо аҕалар өрүү холобур буолаллар.
Кыра-хара үлэ диэбэккэ эр дьон ылыстахтарына тугу кыайбат буолуохтарай. Туох барыта тиэргэнтэн саҕаланарын курдук, Покровскайбыт уулуссалара, болуоссата, Бульвара, өрүү ыраас буоллун диэн санаалаах олоххо көхтөөх дьонунан Үлэ бырааһынньыга тэрилиннэ.
Уйбаан УЙГУУРАП,
Ааптар хаартыскаҕа түһэриитэ уонна видеоҕа устуута: https://t.me/gazetahangalas/37984