Култуура сылыгар
Үөдэйгэ А.И.Калыткина аатынан “Вечерка” култуура киинигэр саха литературатын улуу талааннааҕа, драматург-суруйааччы, фольклорист, учуутал Д.К.Сивцев-Суорун Омоллоон төрөөбүтэ 120 сылыгар анаммыт литературнай туруоруу киэһэтэ буолла.
Бу үөрүүлээх киэһэҕэ биһиги тапталлаах суруйааччыбыт Суорун Омоллоон айымньыларын үйэтитиигэ, кини баай нэһилиэстибэтин ыччаппытыгар билиһиннэриигэ муһуннубут. Саха тыына илгийэр, төрүт култуурабыт кэпсэнэр, үйэлээх үтүө тыл ыраастык иһиллэр кэрэ түгэннэрин үллэһиннибит.
Суруйааччы олоҕун, айар үлэтин туһунан сэргэх иһитиннэриини саха тылын уонна литературатын учуутала Туйаара Васильевна Самсонова оҥордо. Нэһилиэк олохтоохторун уонна орто оскуолабыт үөрэнээччилэрин күүһүнэн Суорун Омоллоон айымньыларынан оҥоһуллубут дьикти туруоруулар көрдөрүлүннүлэр. Ол курдук, начаалынай уонна 5-6-с кылаастар суруйааччы түмпүт остуоруйаларыттан миниатюралары бэлэмнээн билиһиннэрдилэр. Сэттистэр “Хараҥаҕа тыкпыт сырдык”, ахсыстар “Бэйэтэ эмтиэкэ”, тохсустар нуучча тылыгар тылбаастаммыт остуоруйалартан, онустар “Сайсары” айымньыттан испэктээкиллэри туруордулар.“Вечерка” култуура киинэ, нэһилиэк олохтоохторо “Чаачахаан уонна Ала Моҕус” остуоруйаны испэктээх гынан туруордулар. Олус үчүгэйдик оруолларыгар киирэн оонньоотулар саамай аҕам саастаах бэтэрээммин Акулина Гаврильевна Кирова, кулууппут уус-уран салайааччыта Евгений Лугинов,ахсыс кылаас үөрэнээччитэ Чингиз Лаптев, сэттистэн Маша Филиппова, кинилэр оруолларын бэркэ арыйан көрөөччү махталын ылыан ыллылар. Кылаас салайааччылара бары көхтөөхтүк кытыннылар. Бу ураты киэһэҕэ мустубут көрөөччүлэр сахабыт улуу уустарын ааттарын үрдэтистилэр уонна астына сынньанан тарҕастылар.
Галина Скрябина, “Вечерка” фольклорнай норуодунай кэлэктиип салайааччыта, Үөдэй сэл. Хаартыскалары ааптар тиксэрдэ.
