М.Е.Васильева аатынан 2-с Малдьаҕар орто оскуолатыгар ыытыллыбыт “Орлята России” бэстибээл алын сүһүөх үөрэнээччилэрин муста. Манна барыта 4 оскуола хамаандата: Булгунньахтаах, 2-с Малдьаҕар, Тиит Арыы орто оскуолалара уонна 3-с Малдьаҕар оскуолатыттан кэлэн хас да түһүмэххэ күрэхтэстилэр.

Бастаан бары бэлэмнэнэн кэлбит визиткаларын көрдөрдүлэр, онтон станцияларынан сырыттылар. “Эрудит” диэн станцияҕа хамаандалар викторинаҕа кытыннылар, таабырыннары таайдылар, араас ыйытыыларга эппиэттээтилэр. “Мастер” станцияҕа бары эрдэттэн оҥорон аҕалбыт оҥоһуктарын көрдөрдүлэр. “Лидер” станцияҕа бэлэмнэнэн кэлбит дакылааттарын кэпсээтилэр. Манна ким тугу үлэлиирин көрдүбүт, биллибит.

Бары түһүмэҕи ааһан Булгунньахтаах оскуолатын хамаандата “Орленок-Эрудит”, “Орленок-Мастер” номинациялар хаһаайыннарынан буолла. 2-с Малдьаҕар оскуолатын хамаандата “Самая находчивая команда”, “Наставники орлят” номинациялары ылла, Тиит Арыы оскуолатын үөрэнээччилэрэ “Орленок-Лидер”, “Самая дружная команда” ааты ыллылар, 3-с малдьаҕардар “Визитная карточка” номинацияҕа кыайдылар. Онон оҕолор бары үөрэн-көтөн, дьиэлэригэр тарҕастылар.

Заитов Эльдар, М.Е.Васильева аатынан 2-с Малдьаҕар орто оскуолатын 7 кылааһын үөрэнээччитэ.