Нөмүгүтээҕи сылы эргиччи үлэлиир тэпилииссэҕэ кыһыҥҥы кэмҥэ үктэнэн баран бастакы оҕурсуларын быстылар. Бу тэрээһиҥҥэ улууспут баһылыга Сергей Гребнев, дьокутааттар оройуоннааҕы сэбиэттэрин бэрэссэдээтэлэ Анатолий Антонов, тыа хаһаайыстыбатын департаменын салайааччыта Александр Константинов кытыннылар, урбаанньыт Дмитрий Захаров үлэтин-хамнаһын, кыһалҕатын билистилэр.
Покровскайдааҕы ОПХ-ҕа өр сылларга дириэктэринэн үлэлээбит Иван Захаров аатын сүгэр, 1000-тан тахса кв. м иэннээх комплекс былырыын ахсынньыга өрөспүүбүлүкэҕэ тыа сиригэр бастакынан үлэҕэ киирбитэ. Тэпилииссэҕэ оҕурсу үүннэриитинэн агроном идэлээх урбаанньыт Дмитрий Захаров быһаччы үлэлиир. Бу кини дьиэ кэргэнинэн дьыалата.
— Оҕурсу үүннэриитинэн олохтоохтук ылсан үлэлиибит. Уопсайа 2072 үүнээйи баар. Бүгүҥҥү күҥҥэ диэри 37 туонна оҕурсуну хомуйдубут. Быйылгы сылга былааммыт 60-ча туонна, ону ахсынньы түмүктэниэр диэри толоруохпут дии саныыбын. Инники былааммытыгар 360 кв миэтэрэ иэннээх тэпилииссэҕэ “Афицион” диэн сэбирдэхтээх салааты үүннэрэр линияны үлэҕэ киллэриэхтээхпит. Оччотугар күҥҥэ 600 устуука салааты ылар кыахтаныахпыт. Инникитин, Тыа хаһаайыстыбатын уонна ас-үөл бэлиитикэтин министиэристибэтин өттүттэн өйөбүл баар буоллаҕына, эбии тэпилииссэ туттан үлэлиэхпит этэ, — диэн Дмитрий Иванович кылгастык иһитиннэрдэ.
«Сэбиэскэй былаас кэмигэр, 1960-с сыллартан 2000 сыллар саҕаланыахтарыгар дылы, биһиги нэһилиэкпитигэр сүрүн тэрилтэнэн Покровскайдааҕы ОПХ күүскэ үлэлээн ааспыта. Хаһаайыстыба оҕуруот, хортуоппуй үүннэриитинэн, эт-үүт хайысхатынан, оҥорон таһаарыынан дьарыктанара. Эстии сылларын кэннилэриттэн, урут таһаарыылаахтык үлэлээн ааспыт үтүө дьоммут үгэстэрин быспат курдук дьаһанан, сөргүтэр сыалтан, Иван Дмитриевич Захаров төрөппүт уола, биир дойдулаахпыт, аатырар «Саюри» тэрилтэ бастакы дириэктэрэ Дмитрий Иванович аҕатын аатын ааттатан дьоһун производствоны атаҕар туруоран эрэрэ хайҕаллаах”, — диэн Нөмүгү нэһилиэгин баһылыга Наум Устинов санаатын үллэһиннэ.
«Нөмүгүтээҕи сылы эргиччи үлэлиир тэпилииссэ» пилотнай бырайыагынан буолар. Манна гидропоника уонна ууну таммаҕынан кутуу курдук инникилээн иһэр технологиялары туһаналлар.
Көрсүһүү түмүгэр улууспут баһылыга Сергей Гребнев салааты үүннэрэр линияҕа күөх төлөн холбонуутугар, үөрэх тэрилтэлэригэр оҕолор аһылыктарыгар анаан сибиэһэй оҕурсуну тиэрдэргэ салгыы үлэлэһэргэ бэлэмин эттэ.
Уйбаан УЙГУУРАП,
ааптар видеоҕа устуута уонна хаартыскаҕа түһэриитэ.
