Атырдьах ыйын 1 күнүттэн 21-кэ диэри өрөспүүбүлүкэ араас муннуктарыттан байыаннай дьайыы кыттыылаахтарын оҕолоро Наука дьоҕус Академиятыгар «Радуга» лааҕырга сынньанан бардылар. Манна барыта 28 оҕо сырытта.
Лааҕыр түөрт сүрүн хайысханан үлэлээтэ: “Билим”, “Искусство”, “Спорт” уонна “Креативнай индустриялар”. Маны таһынан сынньалаҥ аралдьытар тэрээһиннэрэ, экскурсиялара, араас өй-санаа эрчиллиитигэр дьарыктар ыытылыннылар. Лааҕырга үлэлиир педагогтар сорохторо академия үлэһиттэрэ, ону сэргэ Дьокуускайтан араас идэлээх дьон. Түмүк күнҥэ мин оҕолору кытта көрсөн санааларын атастастым.
Ньургун Сидоров, 9-с кылаас, Горнай улууһа:
-Мин үөрэхпэр үчүгэйбин. Оскуолабын бүтэрэн баран идэтийбит хаартысканан дьүһүйээччи буолуохпун баҕарабын. Онно анаан бу лааҕырга араас дьарыктар ыытыллыбыттарыгар сырыттым. Аныгы, кыахтаах компьютердарга сонун бырагыраамаларынан үлэлии үөрэннибит. Бастакы Президеммит Михаил Николаев төрөөбүт сирин дьэ көрдүм, олоҕун, үлэтин сиһилии билистибит, экскурсия бөҕөтүгэр сырыттыбыт. Лааҕыр аһа-үөлэ минньигэһин, ол иһин асчыттарга махталбын тиэрдэбин. Манна элбэх спортивнай дьарыктар буолбуттара, мин тренажернай саа-ланы астынным. Зоопаркаҕа кыыллары көрбүппүт. Нөмүгүгэ экспедицияҕа бара сылдьыбыппыт, былыргы төрүттэрбит олохторун-дьаһахтарын үөрэтэ. Биһиги бу лааҕырга Горнай улууһуттан алта буолан сырыттыбыт. Сорох оҕолору эрдэ билэттиир этим, сорохторун кытта саҥа билистим.
Катя Егорова, 9-с кылаас, Дьокуускай к.:
— Хаҥалас улууһун айылҕата кэрэтин бэлиэтии көрдүм. Куоракка олорор эрээрибин, Өктөмҥө саҥа кэлэ сырыттым. Лааҕырбыт усулуобуйата үчүгэйиин, киһи сынньанарыгар да, сайдарыгар да бары-барыта баар. Тус бэйэм кыахтаах компьтердарга виртуальнай эйгэни оҥорорго үөрэммиппиттэн астынным. Өссө суруксут култууратыгар үөрэппиттэрэ, манныгы эмиэ саҥа биллим. Бэйэбит, оҕолор «Малая академия волшебства» диэн тэттик киинэ устубуппут, онно күлүү-үөрүү бөҕө буолбуппут. Манна сылдьыбыппыттан олус диэн астынным.
Вова Иванов, 8-с кылаас, Мэҥэ Хаҥалас улууһа:
— Биһиги бииргэ төрөөбүттэр үспүт. Мин олортон ортоку оҕобун. Манна миигин кытта 9 саастаах Коля диэн быраатым сылдьар. Лааҕыр аһа олус минньигэс: хааһы, миин, салаат, фрукта, үрүҥ ас уонна да атын. Өссө пицца буһарарга үөрэммиппит. Түмүк күммүтүгэр барыбытыгар бэлэх бөҕө туттаран ыыттылар. Лааҕырга сылдьан тугу үөрэммиппитин туоһулуур сурук биэрдилэр.
Эрсаан Корякин, 8 саастаах, Дьокуускай к.:
— Мин дьиэ кэргэммэр саамай кыраларабын. Манна сылдьан «Робототехника» куруһуогун сөбүлээтим. Биһиги оскуолабытыгар маннык дьарыктар ыытыллыбаттар. Аныгыскыга каникулбар, бу лааҕыр үлэлиир буоллаҕына, өссө да кэлиэхпин баҕарабын.
Тимур Рубан, эдэр педагог, Дьокуускай к.:
— Мин Дьокуускайдааҕы Инновационнай технологияларга колледж 3 куурсун устудьуонабын. Сайынҥы каникулбар үлэлии сылдьабын. Лааҕырга информационнай технологияҕа үөрэтэбин, 7-6 хас да 9-10 кылаастар үөрэнээччилэрэ, күн аайы сырыттылар. Оҕолору үөрэтэрбин астынным, бэйэлэрэ да дьоҕурдаах, үчүгэй көрдөрүүлэрдээх оҕолор эбиттэр. Маннык ыччаттары кытта үлэлиир үчүгэй.
Дьэ, бу курдук оҕолор Наука дьоҕус академиятыгар «Радуга» лааҕырга сылдьыбыттарын астыммыттар. Өссө да маннык тэрээһиннээх лааҕырдар үлэлии турдуннар.
Татьяна Владимирова.