Нөмүгүттэн Леонид Афанасьев гиирэни көтөҕүүгэ аан дойдутааҕы күрэххэ бастаата

Күрэхтэһии балаҕан ыйын 7-12 күннэригэр Узбекистан Хива куоратыгар этноспорт бэстибээл чэрчитинэн ыытылынна. Манна Россия сүүмэрдэммит хамаандатыгыгар киирэн биэс киһи кыттыбыта уонна 5 кыһыл, 3 үрүҥ көмүс мэтээли ылан эргилиннилэр.

Леонид Афанасьев Бүлүү Бөтүҥүттэн төрүттээх, Нөмүгүгэ олохсуйбута ыраатта. Кини алмааһы кырыылыыр собуокка үлэлээбитэ, онтон суоппардаабыта, билигин Приморьеттан массыына сүүрдэн аҕалыынан дьарыктанар. Кини түөрт оҕолоох ыал аҕата, онтон икки уол ХИФУ устудьуоннара, кыралара кыыстаах уол оскуолаҕа үөрэнэллэр, кэргэнэ Екатерина Романовна олохтоох дьаһалтаҕа бухгаалтырдыыр.

Леонид  Афанасьев биэс бииргэ төрөөбүт бырааттаах, олортон биирдэстэрэ Арсен Афанасьев «Хаҥалас» хаһыаппытын таҥан ааҕааччыларбытыгар тириэрдэр программистпыт.

— Убайым гиирэ спордунан дьарыктаммыта үс сыл буолла. Уруккуттан даҕаны бэйэтин кыанар киһи этэ, — кэпсиир Арсен, — Бастакы тириэньэрэ Саха өрөспүүбүлүкэтин спордун маастара Егор Дмитриевич Андросов. Тыыппалааҕын таба көрөн Хаҥалас улууһугар спортка управлениетыттан Россия спордун маастара Никандр Николаевич Тимо- феев  дьарыктаабыта. Леонид быйыл саас кулун тутарга Чебоксары куоракка Россия чөмпүйэнээтигэр үһүс буолан кэлбитэ, онон Узбекистаҥҥа аан дойдутааҕы күрэххэ кытта барар чиэскэ тиксибитэ. Бу сырыыларын улууспут дьаһалтата өйөөн ситиһиилэр кэллилэр, убайым махтала улахан.

Субуота күн улуус дьаһалтатыгар

Бу күн улууспут дьаһалтатыгар баһылыгы солбуйааччы Юрий Никифоров уонна спорт управлениетын салайааччыта Виктор Громов  Хаҥаластан Узбекистаҥҥа аан дойду күрэхтэһиилэригэр бириистээх миэстэлэри ылбыт чулуу дьоммутун —  гиирэҕэ Ойтон Леонид  Афанасьевы уонна мас тардыһыытыгар Уулаах Аантан Андрей Винокуровы, Төхтүртэн Дмитрий Березкины, Булгунньахтаахтан Ньургун Уваровы чиэстээһини тэрийдилэр.

 Спортсменнарбытыгар Махтал суруктары уонна бэлэх-сертификаттары туттардылар. Кыайыылаахтарын эҕэрдэлии нэһилиэктэрин баһылыктара кэлэн бардылар. Хаҥаластарга ситиһиилэр кэлэ турдуннар!

Людмила Мордовская.