Балаҕан ыйын 27 күнүгэр Тумул нэһилиэгэр улахан суолталаах тэрээһин буолла.
Түмэлбит Никита Гаврилович Соломонов аатын сүгэр. Бу күн киниэхэ аналлаах хос арылынна. Баара буоллар Никита Гаврилович 95 сааһын туолуохтаах этэ.
Анал хос тэриллэригэр нэһилиэк баһылыга Сахаяна Лукина уонна солбуйааччыта Туйаара Галактионова улахан үлэни ыыттылар. Никита Соломонов чугас дьоно уонна аймахтара ытык киһибит наҕараадаларын, бочуотунай грамоталарын уонна махтал суруктарын нэһилиэк түмэлигэр бэлэхтээбиттэригэр улахан махталбытын тиэрдэбит.
Бу анал хоско ытык киһибит 4-с Малдьаҕар нэһилиэгэр төрөөбүтүн туһунан сибидиэтэлистибэтиттэн саҕалаан олоҕун бүтэһик сылыгар тиийэ сүҥкэн үлэтин сыанабылын көрдөрөр наҕараадалара, үлэлэрэ, кэтэ сылдьыбыт таҥаһауонна остуола, кириэһилэтэ кытта баар.
Никита Гаврилович билиигэ тардыһыыта оскуола кэмиттэн биллэр эбит. Кэлин педагогическай училищеҕа уонна институкка үөрэммит дипломун көрөн сөҕөҕүн. Наар туйгун сыанаҕа үөрэммит. Биологическай наука кандидатын туоһулуур дипломуттан саҕалаан профессорга тиийэ үүммүт докумуоннарын киһи сөҕө-махтайа көрөр, биир дойдулаахпытынан киэн туттуу өссө күүһүрэр.
Бу күн элбэх ыалдьыт кэлэн Н. Г. Соломонов туһунан ахтан-санаан аастылар. Ол курдук балта Дария Константинова(Соломонова), сиэн балта Анастасия Соломонова уонна СӨ Наука Академиятын үлэһиттэрэ, үлэтин салҕааччылара наставниктарын туһунан олус истиҥник ахтан аастылар, учуонай аатын сүгэр Тумул түмэлигэр бэлэх туттардылар.
Түмэлгэ баар докумуоннар чулуу киһибит академик олоҕун чинчийэн үөрэтэллэригэр улахан көмө буолуоҕа диэн эрэнэбин.
Лидия Христофорова