Оҕолор билиилэрин хаҥатан бардылар

Наукаҕа айан

Бу күннэргэ биһиэхэ Дьокуускай куораттан «Айыы Кыһата» оскуола үөрэнээччилэрин этно-бөлөҕөсалайааччыларын, дизайнер уонна музыка учуутала Уруйдаана Харитонованы уонна суруналыыс, саха төрүт үгэһин илдьэ сылдьар  Анатолий Павлов-Дабылы, төрөппүттэрин кытта ыалдьыттаатылар.

Этно-бөлөх оҕолоро кыл кырыымпаҕа оонньуур буоланнар мин кинилэргэ анаан туос холбукалар уонна ыаҕыйалар быыстапкаларын туруордум. Биир дойдулааҕым Пелагея Семенова анаан-минээн кэлэн Нөмүгү олоҥхоһута Михаил Саввин-Ботуойа «Мүлдьүөт Бөҕө» олоҥхоттон быһа тардыыны ыалдьыттарга иһитиннэрдэ. Таарыйа ыалдьыттар Пелагея Петровна саҥа Аал Кудук ытарҕатын сонургуу көрдүлэр.

Салгыы таас үйэттэн саҕалаан бүгүҥҥү күҥҥэ диэри баар артефактарбытын көрдөрдүбүт. Ыалдьыттар үөрүүнү кытта хаартыскаҕа түстүлэр. «Эллэйада» лааҕыр оҕолоро үлэни-хамнаһы билиһиннэрдилэр, оҕолор уонна төрөппүттэр «Эргэ ампаар күлүүһүн арый» оонньууга умсугуйан кытыннылар. Юля Заморщикова Кембрий саҕанааҕы кыыллар, агностидтар, трилобиттар тустарынан олус үчүгэйдик кэпсээтэ, төрөппүттэр интэриэстэрин тарта.

Бу курдук туһалаах үтүө күн биллибэккэ ааста. Эдэр музыканнар кырыымпаҕа оонньоон иһитиннэрдилэр.

Түмүккэ биһиги киинэлэрбит афишаларын тутан хаартыскаҕа түстүбүт. Көрсүһүү олус истиҥник ааста. Инникитин да бу курдук саастыы оҕолорбутун кытта бииргэ үлэлииргэ бэлэммит.

Прокопий НОГОВИЦЫН.