Үөрэх дьылын көрсө
Улуус оскуолалара сайыҥҥы сынньалаҥ кэнниттэн үөрэх дьылын саҕалаары бэлэмнэнэллэр. Хаҥалас биир кырдьаҕас И.М.Яковлев аатынан Покровскайдааҕы орто оскуолата быйыл эмиэ быстах өрөмүөнү ыытан үөрэнээччилэрин көрсөөрү түбүгүрэр.
— Быйыл саас оскуоланы 50 оҕо бүтэрбититтэн 70 бырыһыана барыллаан ааҕыынан үрдүк үөрэххэ киирдэ, — үөрүүтүн үллэстэр дириэктэр Спиридон Шишигин, — Сотору кэминэн эбии дааннайдары түмүөхпүт, сорох үөрэхтэргэ киирии түмүгэ бу ый 28-гар биллэр, ким ханна үөрэнэр буолбутун чуолкайдыхпыт. Выпускниктарбыт оннугар 40 оҕону маҥнайгы кылааска долгуйа күүтэбит. Билии күнүн оскуола аанын аан бастаан атыллыыр кырачааннарбытын үөрэ-көтө көрсөн дьоһуннук ыытыахпыт, — диэтэ Покровскайга үгүс үтүө үгэстэрдээх оҕону сахалыы эйгэҕэ үөрэтэр-иитэр соҕотох оскуола салайааччыта.
Людмила Аммосова.