Бу 40-н ус сылын ыытыллар Кыһыҥҥы сүүрүү СӨ педагогическай династияларын баһылыгын, педагогическай наука кандидата биир дойдулаахпыт Николай Николаевич Платонов аатын сүгэр уонна өрүү элбэх кыттааччылаах буолар.
40 сыл анараа өттүгэр аҕыйах хорсун дьон Булгунньахтаахха, Николай Платонов оскуолаҕа физкультура учууталынан үлэлии сырыттаҕына, тымныыны кэрэйбэккэ сүүрэн күрэҕи көҕүлээбит буоллахтарына, аны сүүрүү саастарынан араарыллан элбэх киһини хабан ыытыллар. Урут салгыы “Булгунньахтаах” сопхуос тэрийэр буоллаҕына, билигин өрөспүүбүлүкэ таһымнанан Хаҥаласка үгүс спортсмены түмэр.
Санатан этэр буоллахха, Николай Платонов кэлин кэккэ сылларга Саха госуниверситетыгар физическэй култуура уонна спорт кафедратыгар преподавателынан үлэлээбитэ, кэргэнинээн Любовь Николаевналыын үс оҕону улаатыннарбыт, сиэннэрдэммит дьон. Энтузиаст сүүрүк билигин төһө да биһиги кэккэбитигэр суоҕун иһин, үтүө саҕалааһына батыһааччылардаах.
Онон, сүүрүҥ, өрөбүлгүтүгэр үтүө түгэни бэлэхтээҥ. Кросс Спорт дыбарыаһыттан ахсынньы 15 күнүгэр күнүс 12 чаастан саҕаланар.
Людмила Мордовская.