Оскуола сонуна
Соторутааҕыта биһиги доҕотторбут ыраах Сочи, Краснодар куораттарынан күрэхтэһэн, күүлэйдээн кэллилэр. Бу туһунан күрэх кыттыылааҕа Айсена Борисова кэпсиир:
— Биһиги быйыл «Президент күрэхтэрэ» («Президентские состязания») диэн Бүтүн Россиятааҕы күрэххэ аан бастакыбытын кытынныбыт. Саха сириттэн барыта 18 оҕо, П.С. Скрябин аатынан 1-кы Дьөппөн орто оскуолатын 7 кылааһыттан биһиги 6 оҕо буолан кытынныбыт.
Бастаан Дьокуускайтан Сочига көтөн тиийбиппит. Мантан барарбытыгар төрөппүттэрбит алҕаан атаарбыттара. Сочиттан поеһынан Туапсе куоракка айаннаабыппыт. «Орленок» лааҕырга олохтообуттара. Манна лааҕыр олоҕо күөстүү оргуйара — сарсыарда аайы сэрээккэ, араас интэриэһинэй тэрээһиннэр, сылаас күннэргэ муораҕа сөтүө. Биһиги муораны аан бастакытын көрдүбүт — үчүгэйэ, кэрэтэ, модуна сүрдээх эбит.
«Президент күрэхтэрин» арыллыытын түгэнэ ураты сөҕүмэрэтэ. Харахпар билигин да баар ол көстүү баар! Бу күрэхтэһиигэ биһиги 81 хамаандаттан 25-с миэстэ буоламмыт үөрүү өрөгөйүн биллибит. Биһигини билэр да, билбэт да оҕолорбут үөрэ—көтө эҕэрдэлээбиттэрэ. «Президент күрэхтэрэ» спорт бары көрүҥүн — туризмы, сүүрүүнү, ыстаныыны, сиртэн анньыныыны, имигэс буолууну о.д.а.түмпүт күрэх буолар. Ону барытын биһиги эрдээхтик туорааммыт оскуолабыт, улууспут, өрөспүүбүлүкэбит аатын түһэн биэрбэтибит дии саныыбыт.
Ыраах соҕуруу куоракка тиийэн элбэх оҕолору кытта билистибит, үгүс сонуну, интэриэһинэйи көрдүбүт-иһиттибит, билиибит хаҥаата. Дьоммутугар, доҕотторбутугар, учууталларбытыгар сувенир кэһиилээх кэлэммит үөртүбүт. Нэһилиэкпит дьоно эмиэ айхаллыы көрүстүлэр, үтүө тыл бастыҥын анаатылар. Ол биһиэхэ, оҕолорго, инникитин даҕаны дойдубут чиэһин көмүскүүргэ күүһү—күдэҕи биэрдэ. Барыбыт аатыттан улахан махталбытын, биллэн турар, биһиэхэ көмөлөспүт, сыл устата сыралаһан дьарыктаабыт, араас күрэхтэргэ кытыннарбыт учууталбытыгар, тренербитигэр Очиржап Баировичка, нэһилиэкпит Аҕаларын түмсүүтүгэр, оскуолабыт кэлэктиибигэр, дьоммутугар—сэргэбитигэр үтүө санаабыт бастыҥын аныыбыт!
Санаайа Очиржапова П.С. Скрябин аатынан 1-Дьөппөн орто оскуолатын 7 кылааһын үөрэнээччитэ, «Медиапульс».