Аҕам саастаах дьон декадалара
Хаҥалас улууһугар аҕам саастаах дьон декадалара саҕаланна. Ол чэрчитинэн Покровскайга улуустааҕы Нэһилиэнньэ социальнай көмүскэлин управлениета уонна П.Н. Харитонов-Ойуку аатынан Киин бибилэтиэкэ аҕам саастаах дьоҥҥо анаан бэрт сэргэх тэрээһини ыыттылар.
Дойду үрдүнэн билигин аҕам саастаах дьоҥҥо болҕомто үрдүк, араас социальнай бырайыактар олоххо киирэллэр, уһун үйэлэниигэ туһуламмыт бырагыраамалар ситиһиилээхтик үлэлииллэр. Бу туһунан Хаҥалас улууһун Нэһилиэнньэ социальнай көмүскэлин управлениетын салайааччытын э.т. Елена Иванова эҕэрдэ тылыгар бэлиэтээн эттэ. Кини управление иһинэн үлэлиир күнүскү отделениеҕа икки сыллааҕыта «Школа памяти» тэриллибитин санатта уонна номнуо күн бүгүн бу отделение испэсэлиистэрэ аҕам саастаах дьоҥҥо туһуламмыт, мэйии үлэтин сайыннарар «Ясный ум — Өркөн өй» диэн методическэй босуобуйаны бэлэмнээн оҥорбуттарын иһитиннэрдэ.
Саҥа босуобуйаҕа хайдах-туох дьарыктар киирбиттэрин туһунан күнүскү отделение үрдүк категориялаах терапевт-бырааһа Марианна Егорова сиһилии билиһиннэрдэ. Ол курдук манна көрбүтү өйгө тутууга (зрительная память), бытархай моториканы (мелкая моторика), кылгас кэмнээх өйү сайыннарыыга (кратковременная память) уо.д.а. өй-мэйии үлэтин сайыннарар, кырдьыыны бытаардар дьарыктары, эрчиллиилэри киллэрбиттэр. Хас биирдии эрчиллии сиһилии быһаарыылаах, онон хайа да аҕам саастаах, кырдьаҕас киһи дэбигис өйдөөн толорор кыахтаах.
Салгыы тэрээһин иитинэн «Эрудит-ринг» квиз-оонньуу ыытылынна. Манна Покровскай куораппыт аҕам саастаах олохтоохторо, управление иһинэн үлэлиир күнүскү отделениеҕа сылдьан дьарыктанар, чэбдигирэр дьон хамаандаларга арахсан кытыннылар. Түөрт түһүмэхтээх оонньууну бибилэтиэкэ испэсэлииһэ Александра Новоприезжая иилээн-салайан ыытта, хамаандалары дьүүллүүр сүбэ — бибилэтиэкэр Сардана Гермогенова уонна күнүскү отделение испэсэлииһэ Татьяна Кириллина сыаналаатылар. Эҕэрдэ ырыалаах Александр Уваровскай ыалдьыттаата. Бэрт сэргэх оонньуу түмүгэр кыайыылаах хамаанда Диплом, хас биирдии хамаанда хапытааннара кинигэ бэлэх тутан үөрэн-көтөн тарҕастылар.
Ольга Гермогенова.
Ааптар хаартыскаҕа түһэриитэ, видеоҕа устуута.
