Былырыын Булгунньахтаахха Тоҥуһай сайылыгар сылдьан манна сайылыыр Пан уонна Галина Петровтар дьиэ кэргэннэрин кытта билсэн турабын. Петровтар күн бүгүн кэтэх хаһаайыстыбаларыгар 3 ыанар ынаҕы, 9 ньирэйи, 8 тыһаҕаһы, ону ааһан 4 козаны (иккилэрэ оҕолоохтор), 2 биэни, 2 сибиинньэни иитэллэр.
— Тохсунньу-олунньу ыйдарга индюк, хаас сымыытын атыылаһан бэйэбит инкубаторга баттатан таһаараммыт сайыны быһа көрөн, аһатан-сиэтэн күһүн идэһэ оҥостор үгэстээхпит. Арай быйыл чэпчэтиилээх индюкка сайаапка биэрэн эрэммиппит этэ да, хомойуох иһин, табыллыбата, онон сымыыт баттаппакка хааламмыт индюктара суохпут. Дьиҥэр, бу көтөр түргэнник ситэр буолан сайын устата улаатан күһүн идэһэлииргэ олус астык буолааччы, — диир ыал ийэтэ Галина Михайловна. – Ол оннугар билигин 20 хаастаахпыт, биир оччо куурусса уонна перепелка баар, олорбут сымыыттаан абырыыллар.
Сыл иһигэр сонун уларыйыыбыт диэн электричество уота тардылынна дэһэллэр Петровтар. Былырыыҥҥа диэри дизельнэй ыстаансыйанан уонна күн батареятынан уоттанан олорбут дьоҥҥо бу улахан үөрүү буоллаҕа.
— Агротуризмынан ылсан туран дьарыктаныахпытын сайылыкпытыгар диэри суол-иис суоҕа атахтыыр. Инникитин суол оҥоһулуннар туристар кэлэллэригэр-баралларыгар табыгастаах буолуо этэ. Кыралаан дьиэ кэргэнинэн сынньанааччылар таарыйан ааһааччылар ээ, куорат дьоно бэйэ үрүҥ аһын, сир аһын атыылаһааччылар, кыылбытын-сүөлбүтүн көрөөччүлэр, — диэн хаһаайка санаатын үллэстэр.
Петровтар билигин күнү-дьылы баттаһа окко күүскэ үлэлии сылдьаллар. Сайылыкка от үүнүүтэ үчүгэй эбит, ыал аҕата оҕолорунаан, сиэннэринээн күһүүр отторун манна бэлэмниир. Арыытааҕы ходуһаларыгар 20 туонна оттоммуттар.
Ыал ийэтэ сайын устата көрбүт-харайбыт оҕуруотун үүнүүтэ эмиэ киһи сирбэтэ. Хаартыскаҕа көрөргүт курдук — көтөх муҥунан оҕурсу, кабачок, биэдэрэнэн помидор. Бу курдук тыа ыалын сиэринэн күөх сайын быйаҥыттан сомсон, хара көлөһүннэринэн булунан-тэринэн олороллор Тоҥуһай сайылык ыаллара.
Ольга Гермогенова.