Сата тааһа диэни билигин ким да билбэт буолуохтаах. Былыргы сахалар өйдөбүллэринэн, сата тааһа диэн тыалы, ардаҕы түһэрэр аптаах таас. Сата тааһын сылгы, ынах, таба эбэтэр улар куртаҕыттан булаллар.
Былыргы биһиги төрүттэрбит түүрдэр сата тааһын эмиэ итинник суолтаҕа тутталлар эбит. Тыалы, ардаҕы, тымныыны түһэриэхтэрин баҕардахтарына, сата тааһын талахха баайан баран, үрдүк сиргэ тахсан, түргэнник эргитэллэр. Сата тааһын буллахтарына дьоҥҥо көрдөрбөттөр, таҥаска, түүлээххэ суулаан кистии туталлар үһү. Этиҥ сатата диэни этиҥ түспүт маһын төрдүттэн сарсыарда күн тахсыан иннинэ дэҥҥэ булаллар диэн И.А. Худяков суруйар. Былыр сааскы ириэһиҥҥэ кыылы бултуулларыгар тоҥоту түһэриэхтэрин баҕардахтарына, эмиэ сата тааһын тутталларын А.Е. Кулаковскай бэлиэтиир. Өссө Анаабырга былыр сата тааһын оннугар таарбаҕан тириитин тутталлар диир. Ардыгар сата тааһа төгүрүк буолбакка киһи курдук быһыылаах буолар: мурун, харах, айах оруннаах. И.А. Худяков сахалар былыр сата тааһыгар маарынныыр хотой уйатыттан дьол тааһа диэн ааттаах кус сымыытын саҕа тааһы булалларын туһунан эмиэ суруйар. Итиниэхэ маарынныыр безоар диэн дьиэ сүөһүтүн куттаҕар, хабаҕар үөскүүр тааска майгынныыр эттиктэр бааллара наукаҕа биллэр. Биллиилээх орнитолог Б.Н. Андреев тэрийбит Элгээйитээҕи айылҕа музейыгар оннук эттиктэри көрүөххэ сөп.
Гаврил Герасимов, Хачыкаат сэл.
«Өлүөнэ очуостара», тохсунньу 26 күнэ 1991 с.
Хаартыска интернет ситимиттэн.