Сарсыҥҥыттан саҕалаан Хаҥалас улууһугар ситэриилээх былаас ааспыт сыллааҕы үлэтин отчуота бары нэһилиэктэри уонна Мохсоҕоллоох бөһүөлэгин хабан туран ыытыллыаҕа. Түмүктүүр отчуот Покровскай куоракка олунньу 7 күнүгэр «Саргы Түһүлгэтэ” норуот айымньытын уонна култуура киинигэр киэһэ 17:00 чаастан буолуоҕа. Саха Өрөспүүбүлүкэтин Бырабыыталыстыбатын бэрэссэдээтэлин солбуйааччы Анатолий Семенов салайааччылаах дэлэгээссийэ, үс бөлөххө арахсан олунньу ый 5-7 күннэригэр бары нэһилиэнньэлээх пууннарга сылдьыахтара.
Олунньу 5 күнүгэр Саха Өрөспүүбүлүкэтин Бырабыыталыстыбатын бэрэссэдээтэлин солбуйааччы Анатолий Семенов салайааччылаах бөлөх Сиинэ, Үөдэй, Кытыл Дьура, олунньу 6 күнүгэр Иһит, Тумул, олунньу 7күнүгэр I Малдьаҕар нэһилиэгин Тойон Арыытыгар, Булгунньахтаахха, бу күн түмүктүүр отчуоту Покровскай куоракка истиэхтэрэ.
Иккис бөлөҕү СӨ физическэй култуураҕа уонна спортка миниистирэ Леонид Спиридонов салайыаҕа. Олунньу 5 күнүгэр Тиит- Арыы нэһилиэгин Чкалов учаастагар, Тиит-Арыыга, Улахан Ааҥҥа отчуоттуохтара. Олунньу 6 күнүгэр Мохсоҕоллоох бөһүөлэгэр, Уулаах-Ааҥҥа, Өктөмҥө сылдьыахтара. Олунньу 7 күнүгэр Төхтүр нэһилиэгэр уонна түмүктүүр отчуокка Покровскайга кыттыыны ылыахтара.
Үһүс бөлөҕү Үп миниистирин солбуйааччы Анна Алексеева баһылаан салайыаҕа. Олунньу 5 күнүгэр Нөмүгүгэ, Бэстээххэ, олунньу 6 күнүгэр Хоточчуга, I Дьөппөҥҥө, II Дьөппөҥҥө отчуоттуохтара. Олунньу 7 күнүгэр Кыһыл Үрүйэҕэ, Хачыкаакка уонна түмүктүүр отчуокка Покровскай куоракка сылдьыахтара.
Отчуот кэмигэр олохтоох дьон-сэргэ долгутар ыйытыктарыгар, тута хоруйдары ылыахтара.
Уйбаан УЙГУУРАП.