Социальнай гаастааһын
Хаҥалас улууһугар 2021 сылтан социальнай гаастааһын бырагыраамата баар буолан улуус 553 ыалын дьиэтэ күөх төлөҥҥө холбоммуттара. Быйылгы сылга «Сахатранснефтегаз» АУо Хаҥаластааҕы учаастагын иннигэр улуус 70 ыалын күөх төлөҥҥө холбуур сорук турар.
Былаан туоларыгар бигэ эрэллээхтэр. «Сахатранснефтегаз» АУо Хаҥаластааҕы учаастагын гааһы тарҕатар ситимнэрин начаалынньыга Дмитрий Муксунов санаатын маннык иһитиннэрдэ:
— «Сахатранснефтегаз» АУо Хаҥаластааҕы учаастагар 100 исписэлиис үлэлиир. Кинилэр 511 км усталаах гаас утаҕын, 9 нэһилиэнньэлээх пууҥҥа (Покровскайга, Мохсоҕоллооххо, Үөһээ Бэстээххэ, Булгунньахтаахха, Улахан Ааҥҥа, Төхтүргэ, Өктөмҥө, Уулаах Ааҥҥа уонна Нөмүгүгэ), олиһигэр 50 гааһы тарҕатар пууннары, ОДьХХ уонна “Хаҥаластааҕы газстрой” АУо хочуолунайдарын, 9 346 дьонолорор дьиэлэрин, ол иһигэр элбэх кыбартыыралаах дьиэлэри көрөбүт-истэбит. Россия Президенэ Владимир Путин сорудаҕынан «Нэһилиэнньэни социальнай гаастааһын» «Биир ньыгыл Россия» бырагырааматын олоххо киллэрии салҕанар. Ол курдук, 2021 сыллаахха бастаан 8 ыалы күөх төлөҥҥө холбообуппут. 2022 с. – 99, 2023 с. – 155 ыал гааска холбоммута. Саамай үлэлэспит сылбытынан 2024 сыл буолар — 219 ыалга киллэрбиппит. Былырыын 2025 сылга эмиэ үчүгэйдик үлэлээбиппит уонна 76 ыалга гаас холбоммута. Итини сэргэ хапытаалынай өрөмүөн үлэлэрин ыыппыппыт. Покровскайы, Нөмүгүнү, Мохсоҕоллооҕу арааран туран, Покровскай куорат иһигэр 1095 миэтэрэ дьиэктээх, болдьохторо ааспыт гаас турбаларын уларыппыппыт, улахан үлэни толорбуппут. Бу үүммүт 2026 сылга биһиэхэ былааммыт 70 ыалы күөх төлөҥҥө холбуохтаахпыт. Итини сэргэ саҥа микрооройуоҥҥа АБЗ-2,Интернациональная уонна Семейная уулуссаларга саҥа гааһы тарҕатар пууну (ГРП) тутуохтаахпыт, — диэтэ Дмитрий Григорьевич.
Покровскай куоракка сыллата саҥа түөлбэлэр үөскүүллэр, дьон-сэргэ сөбүлээн олохсуйан дьиэ тутталлар.«Сахатранснефтегаз» Хаҥаластааҕы учаастага Сахабыт сиригэр гааһы ыалларга холбооһуҥҥа, хапытаалынай өрөмүөн үлэлэрин ыытыыга, дьиэктээх, болдьохторо ааспыт гаас тыраассатын турбаларын уларытыыга, сүҥкэн үлэлэри толороннор бастыҥнар кэккэлэригэр сылдьар.
Уйбаан УЙГУУРАП,
хаартыскаҕа: «Сахатранснефтегаз» АУо Хаҥаластааҕы учаастагын гааһы тарҕатар ситимнэрин начаалынньыга Дмитрий МУКСУНОВ.