Улууспут хаһыата 85 сылын туолла. Бу сыллар тухары Хаҥалас дьонун-сэргэтин кытары алтыһан үөрүүнү-холмолтону тэҥҥэ үллэстэн кэллэ. Бу күннэргэ үүнэр сылга «Хаҥаласка” сурутуу бара турар.
Редакциябыт биллэрбит “Бэтэрээҥҥэ суруттар!” акцията салҕанар. Биир бастакынан сурутууга биһиги көхтөөх спонсордарбыт Ил Түмэҥҥэ дьокутааппыт Алиш Мамедов салайар “Якутцемент” производственнай холбоһукпут үгэс быһыытынан кэлэктиибин аҕам саастаах дьонугар хаһыакка суруттаран өйөөтө. Ону сэргэ элбэх хаһыаты, ол иһигэр сахалыы тыллаах “Хаҥалаһы», өссө биир бэчээт суолтатын сыаналыыр Үөрэх үлэһиттэрин идэлээх сойуустарын улуустааҕы кэмитиэтэ салайааччы Валерий Семенов өйөбүлүнэн бэтэрээннэригэр сурутууну биир бастакынан күһүөрү ыыппыта. Итини кытары алтынньыга Ил Түмэн бэрээссэдээтэлин солбуйааччыта Афанасий Владимиров бэчээккэ сурутуу биллэриллээтин кытары спонсордаан биэс ыал тапталлаах хаһыатын Саҥа дьылтан ылан ааҕар кыахтанна.
Бу күннэргэ Улуус Мунньаҕын салайааччыта Анатолий Антонов эмиэ биэс киһиэхэ сурутуу бэлэхтээтэ. Бэлиэтиэ этим, улууспут дьокутааттара бары даҕаны кини үтүө холобурунан сурутууга көхтөөхтүк кытталлар. Итини сэргэ биирдиилээн патриоттарбыт хастыы да хаһыаты кырдьаҕастарыгар эрэ буолбакка, элбэх оҕолоох ыалларга, Анал байыаннай дьайыы кыттыылаахтарын дьиэ кэргэттэригэр сурутууга өрүү кытталлар. Ол курдук, Дьокуускай куораттан биир дойдулаахтарыгар өрүү урукку кэмҥэ улууспутугар салалтаҕа үлэлээбит Вячеслав Алексеев, Николай Макаров, Покровскайтан Борис Протодьяконов, аны оҕо уһуйаанын буҕаалтыра Татьяна Петрова — поэт Мойуу Кыыһа кылааһынньыктарын кытары Мохсоҕоллоохтооҕу кырдьаҕастар дьиэлэригэр олорооччуларга сыллата хаһыаттары сурутан көмөлөһөрүн, Кыһыл Үрүйэттэн “Булуус” туристическай комплексы дьиэ кэргэнинэн салайан олорор Анатолий, Дарья Константиновтар ыччаттарынаан эмиэ элбэх хаһыаты дьоҥҥо суруттаралларын, улуустааҕы бибилэтиэкэ үлэһиттэрэ бэтэрээннэрин умнубаттарын махтана ахтан аһарабыт. Биэрэр или тутайбат диэн баар, дьон үтүө санаата уонна оччонон төннөр.
Биллэн турар, почта үлэтэ быстар мөлтөҕүнэн, төһө даҕаны редакция үгүс үбү өҥө иһин кута турдар, ааҕааччыга суруппут хаһыаттарын кэмигэр тириэрдибэккэ, дьон эрэйдэнэр. Ол курдук, күһүн оннооҕор Покровскайга почтальоннар сорохторо уоппускаҕа барбыт кэмнэригэр хаһыаты тириэрдии тардылла сылдьыбыта сурутууга охсуулаах буолла.
Кыра нэһилиэнньэлээх пууннарга почтальоннар суохтара сурутууну эмиэ атахтыыр. Дьиҥинэн, бу дьыаланы олохтоох дьаһалталар дьонноругар кыһаллар буоллахтарына, илиилэригэр ылан син дьаһайар кыахтаахтар. Биһиги көрөрбүтүнэн, баһылыктар почта кыһалҕаларын өйдөөн, Покровскайга элбэхтик кэлэ-бара туралларынан, саатар хаһыаттары почтаны кытары эрдэттэн кэпсэтэн ылан илдьэр кыахтаахтар. Онтон дэриэбинэ иһигэр аны батсаап да бэркэ үлэлиир, түөлбэлэр, дьокутааттар диэннэр бааллар, испииһэгинэн маҕаһыыннарга да тириэрдэн сурутааччыга тиксэриэххэ син ини. Кыһалла түһүөххэ эрэ наада. Бэлиэтии көрөрбүтүнэн, саастаах дьон үөрэммиччэ кумааҕы хаһыаты ааҕалларын ордороллор. Социальнай ситимнэргэ информациябыт барыта тахсыбат, арай электроннай таһаарыыбыт көхтөөхтүк тарҕаннаҕына, ПДФ көрүҥүнэн суруттаран сонуннары ылыахтарын сөп. Ити инниттэн аны телеграм ханаалга холбонуу ирдэнэр.
Покровскайга дьон хаһыаты маҕаһыыннартан ылар буоллахтарына, дэриэбинэлэргэ ити суох. Ол да иһин буолуо сахалыы хаһыаты сурутааччыларбыт тыа сиригэр ордук элбэх. Бэчээккэ сурутуу ахсынньы 20-тин кэнниттэн түмүктэнэринэн, сурутууну куоттарымаҥ! Улууспут, дойдубут сонуннарын хаһыаттарбытыттан ааҕыаххыт, санааҕытын үллэстиэххит диэн эрэнэбит.
Людмила Аммосова.