Аҕам саастаахтар күннэригэр
Алтынньы 1 күнүгэр дойду үрдүнэн Аҕам саастаахтар күннэрэ бэлиэтэнэр. Бу бэлиэ күн чэрчитинэн алтынньы 1-10 күннэригэр улууска Аҕам саастаахтар декадалара ыытыллыа. Хаҥаластааҕы Нэһилиэнньэ социальнай көмүскэлин управлениетын начаалынньыга Светлана Константинова иһитиннэрбитинэн, быйыл даҕаны киэҥ бырагыраамалаах араас тэрээһиннэр ыытыллаллара былааннанар.
Ол курдук, декада кэмигэр, үгэс быһыытынан, Нэһилиэнньэ социальнай көмүскэлин управлениетыгар Аһаҕас аан күннэрэ тэриллиэхтэрэ. Онон араас ыйытыылаах, кыһалҕалаах дьон испэсэлиистэртэн толору сүбэ-ама ылыахтара. Ону сэргэ испэсэлиистэр Эркээни хочотун нэһилиэктэригэр, өрүс уҥуоргу сэлиэнньэлэргэ сылдьан үлэлиэхтэрэ. Социальнай үлэһиттэр «Чистый дом» аахсыйанан кыаммат, саастаах дьоҥҥо дьиэлэрин-уоттарын кыстыкка бэлэмнииргэ, оҕуруот аһын харайарга көмөлөһүөхтэрэ.
— Биһиги биир үтүө үгэспитинэн «Хаҥалас-Ас» ТХПК, Мохсоҕоллоохтооҕу килиэп собуотун өйөбүллэринэн улууспут аҕам саастаахтарыгар үүт, бурдук ас тарҕатарбыт буолар. Киһиэхэ кыра да болҕомто санааны күүһүрдэр, онон быйыл даҕаны дьоммутугар маннык бэлэх оҥоруохпут. Аны туран Покровскайга күнүскү отделение кыттыылаахтарыгар библиотечнай чаас, буулдьанан ытыыга күрэх, «Синемания» киинэ-тыйаатырыгар босхо киинэҕэ сырытыннарыы, гериатр-быраас лекцията тэриллиэ. Биһиги бу күнүскү отделениебытыгар өрөспүүбүлүкэбит, улууспут биллэр-көстөр дьонун кытта көрсүһүү тэрийээччибит. Бу сырыыга «Олох көмүс күһүнэ» бырагыраамалаах «Саха» НКИХ ыытааччыта Георгий Белоусовы кытта истиҥ көрүһүү буолуо. Биллэн турар, биһиги бу араас тэрээһиммитигэр общественнай түмсүүлэр, тэрилтэлэр көмө буолаллар. Покровскайга «Тепло сердец» кэрэ аҥардар общественнай түмсүүлэрэ сынньалаҥ биэчэрин бэлэмнииллэр.
Ону сэргэ биһиги кырдьаҕастарбытын оскуолалар үөрэнээччилэрэ эҕэрдэлиэхтэрэ. Аҕам саастаахтарга илиинэн араас оҥоһукка маастар-кылаастар, Зоопаркаҕа, NARAADA-Village пааркаҕа экскурсиялар тэриллиэхтэрэ. Мохсоҕоллооххо «Феникс» АНО туустаах кабинетыгар, Якутцемент бассейныгар сылдьан доруобуйаларын бөҕөргөтүнүөхтэрэ. Онон, көмүс саастаах дьоммут эрдэттэн күҥҥүтүн былааннааҥ, үөрэ-көтө бу умнуллубат күнү атаараргытыгар баҕарабын. Көхтөөх буолуу —уһун үйэлэнии мэктиэтэ буоларын умнумаҥ.
Ольга Гермогенова.