Аан дойдутааҕы Аҕам саастаахтар күннэрин чэрчитинэн, Төхтүр нэһилиэгин пенсионердарын көҕүлээһининэн (салайааччы Мотрена Ефремова) бэһис төгүлүн улуустааҕы «Төлөннөөх сүрэхтэр» спартакиада бэрт тэрээһиннээхтик ыытылынна.
Спартакиадаҕа улууспут аҕыс нэһилиэгиттэн кыттааччылар кэлэн спорт аҕыс көрүҥэр күрэхтэстилэр. Олоххо өрүү көхтөөх, инники күөҥҥэ сылдьар дьоммут төһө да сааһырдаллар сэргэхтик туттан, көрүҥ аайы бэйэлэрин дьоннорун туруоран, бииртэн биир күрэх тохтоло суох баран истэ. Бу улахан тэрээһиммит үөрүүлээх арыллыытын култуура киинин испэсэлииһэ Тамила Суханова ыытта. Хамаандалары улууспут спортка управлениетын сүрүн испэсэлииһэ Вероника Трофимова эҕэрдэлээтэ, күрэҕи тэрийээччилэргэ Махтал сурук туттарда. «Эн сулускун” бырайыак кыттыылааҕа Николай Макаров, улууска биллэр ырыа айааччы Андриан Егоров алыптаах ырыаларынан күрэх кыттыылаахтарын кыайыыга кынаттаатылар. Дуобат, саахымат көрүҥүн спорт маастара Александр Соломонов, сахалыы остуол оонньууларын Елена Соломонова, остуол тенниһин физкультура учуутала Николай Филиппов, буулдьанан ытыыны Валерий Адамов, дартсы Екатерина Егорова, Владимир Кузьмин, Назар Шадрин, хомуур күрэҕин Дмитрий Березкин, Владимир Кузьмин салайан ыыттылар, ыраастык сыаналаан түмүгү таһаардылар. Спартакиадабытын түмүктүүр култуурунай чааһын Зинаида Аввакумова иилээн-салайан ыытта. Кыттааччылар ырыа-үҥкүү бэлэмнээн кэлэн бииртэн биир сэргэх нүөмэри көрдөрдүлэр. Даҕатан эттэххэ, бу улахан тэрээһини биэс сыл устата Төхтүр нэһилиэгин А.И. Борисов аатынан «Эркээни» Култуура киинин үлэһиттэрэ тэҥҥэ тэрийсэн ыытыһаллар. Спортсменнары көрсүү, ас астаан кафе үлэлэтии, аппаратуранан хааччыйыы, култуурунай тэрээһинин ыытыы — барыта кинилэр тэрийиилэринэн ааһар.
Сытыы, көхтөөх уонна көрдөөх киирсии түмүгэр дуобакка Өктөм нэһилиэгин хамаандата бастаата, иккис миэстэ Булгунньахтаах пенсионердара, үһүс Төхтүр нэһилиэгэ буоллулар. Саахымакка Нөмүгү хамаандата инники күөҥҥэ таҕыста, иккис — өктөмнөр, үһүс миэстэни Улахан Аан өркөн өйдөөхтөрө ыллылар. Хабылыкка, хаамыскаҕа Покровскай куорат бастаата, Өктөм, Нөмүгү туһааннааҕынан иккис, үһүс буоллулар, өбүгэлэрбит оонньууларын үйэтитэн үрдэлгэ сылдьалларын толору туоһулаатылар. Остуол тенниһигэр Нөмүгү хамаандата бастаата, иккискэ Булгунньахтаах, үһүскэ Мохсоҕоллоох таҕыста. Хайа да кэмҥэ саха сааланан бултаан-алтаан дьонун, дьиэ кэргэнин аһатар-таҥыннарар. Онон буулдьанан ытыы көрүҥэр кыраҕы харахтаахтарынан покровскайдар буоллулар, иккискэ Нөмүгү хамаандата, үһүскэ Уулаах Аан ытааччылара тиксэн үөрүүлэрэ үрдээтэ. Хомуур күрэҕэ диэн сонун көрүҥ түргэн туттунууну ирдиир, сис, атах тургутуллар оонньуута эбит. Манна нөмүгүлэр иннилэрин кимиэхэ да биэрбэтилэр. Булгунньахтаахтар иккис, Покровскай көхтөөх дьоно үһүс буоллулар. Уопсай түмүгүнэн Покровскай куорат хамаандата бастакы, Нөмүгү нэһилиэгэ иккис уонна бочуоттаах үһүс миэстэ Булгунньахтаах спортсменнара буоллулар.
Чэгиэн-чэбдик олоҕу өрүү өрө тутан кырдьар сааска тиийбит, чахчы да төлөннөөх сүрэхтээх, көхтөөх дьоммут, барыта 150 киһи, Эркээни хочотугар түмсэн, ирэ-хоро кэпсэтэн, үөрэ-көтө күрэхтэһэн тарҕастылар.
Сыллата ыытар тэрээһиммит нэһилиэкпит дьонун түмэр, сомоҕолуур. Олохтоох нэһилиэк дьаһалта, А.Д Широких аатынан Төхтүр орто оскуолатын кэлэктиибэ, Хаҥалас улууһун спортка управлениета спартакиада тэриллэригэр күүс-көмө буолалларыгар, сүрүн спонсордарбытыгар — «Орто Дойду” сынньалаҥ комплексыгар (сал. Андреев П.), «КиинМаркет” атыы-эргиэн киинигэр (сал. Слепцова А.), “Куллаты мүөтэ” тэрилтэҕэ (сал. Иванова З.) махталбытын тиэрдэбин.
Мотрена Ефремова,
Төхтүр нэһилиэгин пенсионердарын түмсүүтүн салайааччыта.
