Былырыын бу күн, алтынньы 16-гар, Куллаты ытык сиригэр саха омугу биир сомоҕо улуу илгэ сирдээбит Хаҥалас уустарын аҕа баһылыгар Тыгын Тойоҥҥо уонна номоххо киирбит чулуу дьоммутугар Маһары Баһыакапка, Соппуруон Сыраанапка, Ылдьаа Саадырыҥҥа өйдөбүнньүк бэлиэтин туруоран хаҥаластар дириҥ силистээхпитин, баай историялаахпытын өссө төгүл бигэргэппиппит. Бу улууспут история уонна култуура нэһилиэстибэтин харыстааһыҥҥа уонна кэлэр көлүөнэлэргэ билиһиннэрэргэ, олорон ааспыт өбүгэлэрбитин үйэтитэргэ өссө биир хардыынан буолбута.
Улуус дьаһалтатыгар Хаҥалас ааппыт төннүүтүнэн үөрүүлээх мунньаҕы баһылык Сергей Гребнев мустубут дьону эҕэрдэлээн, кылгастык улуус сайдыытыгар барар үлэни сырдатан, инникигэ сорук туруоран түмсүүлээх, сомоҕо буоларга ыҥыран арыйда. Биир дойдулаахпыт, Саха Өрөспүүбүлүкэтин Судаарыстыбаннай Мунньаҕын (Ил Түмэн) бэрэссэдээтэлин солбуйааччы Афанасий Владимиров бэлиэ күммүтүнэн эҕэрдэ тылы эттэ, кылгастык Сахабыт сиригэр олоххо-дьаһахха балаһыанньаны билиһиннэрдэ.
Дойдуга уларыта тутуу дьаалханнаах кэмигэр 34 сыл анараа өттүгэр хайдах дьаһанан Хаҥалас буолбуппут уонна бу инники дьылҕаны быһаарыныы суолтатын туһунан төрүт ааппыт төннөрүллүүтүн туоһулара, оччотооҕуга улууспут салайааччытын бастакы солбуйааччытынан үлэлии сылдьыбыт, өрөспүүбүлүкэ норуотун хаһаайыстыбатын үтүөлээх үлэһитэ, билигин улуус баһылыгын иитинэн үлэлиир Ытык сүбэ бэрэссэдээтэлэ Вячеслав Алексеев, норуот суруйааччыта Павел Харитонов-Ойуку, РФ уонна СӨ үтүөлээх юриһэ, юридическай наука дуоктара Александр Ким-Кимэн тыл эттилэр, ытык ааты дьоһуннук илдьэ сылдьарга баҕа санааларын тириэртилэр.
Бу күн улууспут сайдыытыгар араас эйгэҕэ дьоһуннук үлэлии сылдьар чулуу общественниктарга наҕараадалары туттарыы буолла.
Ол курдук, “Саха Өрөспүүбүлүкэтин ыччат политикатын туйгуна» түөскэ иилинэр бэлиэ олоххо көхтөөх култуура үлэһитигэр Эргис Тимофеевич Давыдовка, ”Саха Өрөспүүбүлүкэтин гражданскай аактары бэлиэтиир уорганнарын сайдыытыгар кылаатын иһин” диэн бэлиэ Тумултан СӨ муниципальнай сулууспа туйгунугар Яна Ивановна Кузьминаҕа, СӨ үпкэ миниистирин Махтал суруга Мохсоҕолоох дьаһалтатын кыл. буҕаалтырыгар Елена Валериевна Федороваҕа, «Хаҥалас улууһун социальнай-экономическэй сайдыытыгар кылаатын иһин» бэлиэ Тиит Арыыттан энергетика бэтэрээнигэр Николай Николаевич Варламовка, “Хаҥалас улууһа” МО хонтуруоллуур-счетнай палаата кыл. иниспиэктэригэр Владимир Геннадьевич Макаровка, 1-Дьөппөн санаторнай оскуолатын поварыгар Валентина Васильевна Поповаҕа, улууспутугар култуура маассабай тэрээһиннэрин ыытыыга дьоһун кылааттарын иһин меценат С.П.Барашков аатынан иккис, үһүс истиэпэннээх бочуот-бэлиэлэрин урбаанньыттарга Виктория Васильевна Даниловаҕа, Кристина Дмитриевна До, “Хаҥалас улууһун үөрэҕирии ситимин сайдыытыгар кылаатын иһин” бэлиэ Тиит Арыы оскуолатын дириэктэригэр Эльвира Петровна Герасимоваҕа туттарылынна. Ону сэргэ “Хаҥалас улууһун Бочуоттаах олохтооҕо” аат иҥэриллиитинэн бэлиэлэри, дастабырыанньалары бу үөрүүлээх күн туттулар 100 сааһын туолбут Тиит Арыы нэһилиэгин бочуоттаах олохтооҕо, герой-ийэ Фекла Степановна Егорова, общественниктар 1-Дьөппөн нэһилиэгин бочуоттаах олохтооҕо, Россия суруналыыстарын сойууһун чилиэнэ Ермолай Еремеевич Скрябин, тыа хаһаайыстыбатын бэтэрээнэ 2-Дьөппөн бочуоттаах олохтооҕо Николай ФилипповичТрофимов, Покровскай куорат бочуоттаах олохтоохторо дьахтар хамсааһынан настаабынньыга, СӨ дьахталлар хамсааһыннарын сойууһун чилиэнэ Октябрина Ивановна Щипицына, Покровскайдааҕы гимназия дириэктэрэ Юлия Егоровна Ноговицына, Өктөм нэһилиэгин бочуоттаах олохтооҕо “Өрөспүүбүлүкэтээҕи Плюс инвестиционнай хампаанньа” АО генеральнай дириэктэрэ Петр Вячеславович Алексеев.
Бэлиэ күнү ырыаһыттарбыт Алена Слепцова, Замир Горохов киэргэттилэр. Тэрээһин Светлана Парникова салайар Покровскай хуора кыттыылаах “Хаҥаластар буолабыт» өрөгөй ырыатынан түмүктэннэ.
Людмила Аммосова.
Хаартыска “Хаҥалас улууһа” МО пресс-сулууспатыттан.
