#Норуот маастарын күнүн көрсө
Кулун тутар 5 күнүгэр Сахабыт сиригэр Норуот маастарын күнэ олохтонон киэҥник бэлиэтэнэр. Быйылгы тэрээһиннэр дойдуга Сомоҕолоһуу уонна өрөспүүбүлүкэбитигэр Култуура сылларын чэрчитинэн ыытыллаллар.
Хаҥалас улууһугар үйэттэн үйэҕэ өбүгэлэрбит үтүө дьарыктарын утумнаан, ситимнэрин салҕаан, талба талааннаах иистэнньэҥнэрбит, тимири ыллатар уустарбыт, мас оҥоһуктар маастардара, үйэлээҕи үөдүтээччилэр, оһуор дьарҕаа түһэрээччилэр, илиилэрин сылааһын таҥаска иҥэрэн, дууһаларын ырыатын оһуорга тиһэн, үйэлээх оҥоһуктары айааччылар аҕыйаҕа суохтар. Кинилэр бу күннэргэ Дьокуускайга тэриллэр араас анал быыстапкаларга, маастар-кылаастарга, куонкурустарга көхтөөхтүк кыттаары бэлэмнэнэ сылдьаллар. Оттон Улахан Аантан Хаҥалас улууһун норуот маастара Римма Трофимова “Россия норуоттарын оһуордара”(«Узоры народов России») паннону оҥоруу куонкурсугар номнуо атын улуустар иистэнньэҥнэриниин тэҥҥэ кытта сылдьар.
«XVI «Якутия мастеровая» быыстапка-дьаарбаҥкаҕа түмсүүлэри кытта холбоон барыта 36 киһи кыттыа. Дьокуускай куоракка Өксөкүлээх Өлөксөй аатынан Норуоттар доҕордоһууларын киинигэр «Бастыҥ Кылаан. Битва клинков» саха быһаҕын оҥорооччуларын күрэҕэ тэриллээри турар. Онно биһиги саҥа саҕалыыр эдэр уустарбыт Нөмүгүттэн, Өктөмтөн, Покровскайтан Наум Устинов, Николай Пермяков, Илья Иванов уонна Альберт Никифоров кыттарга бэлэмнэр. Үгэс буолбут саха национальнай таҥаһын кэтэн сэлэлээн хаамыы быйыл үбүлүөйдээх 10-c сыла, онно биһиги талба талааннаахтарбыт, барыта 45 киһи, эмиэ кыттаары бэлэмнэнэ сылдьаллар», — диэн Покровскай куорат «Арчы дьиэтэ» норуот айымньытын киинин методиһа Наталия Федорова иһитиннэрдэ.
Ольга Гермогенова.
Хаартыскалары Римма Трофимова тиксэрдэ.
