Тиит-Эбэ сэлиэнньэ тэрилтэлэрин эр хоһууттара сэтинньи 5 күнүгэр тимир көлөлөрүгэр олорон Эбэ күөлгэ киирдилэр.
«ЫРААС МУУС» муус ылыытыгар күрэххэ түөрт тэрилтэ кытынна – олохтоох дьаһалта, бааһарынай чаас, интернат-оскуола уонна орто оскуола коллективтарын хамаандалара.
Күрэхпитин алгыстаах тылынан Татьяна Сивцева-Сайнаара арыйда, эр хоһууннарбытыгар ыраастаныы сиэрин — туомун толордо. Уолаттарбытын арыылаах алаадьыннан күндүлээтибит. Күрэх кыттыылаахтарыгар ситиһиини баҕаран нэһилиэк аҕа баһылыга Андрей Яковлев эҕэрдэлээтэ. Дьэ онтон хамаандалар биир чаастаах күрэххэ туруннулар, үлэлэрэ саҕаланна. Хатыһыылаах күрэҕи И.С. Скрябин, Д.А. Ефремов, И.Е. Федотов састааптаах дьүүллүүр сүбэ салайан ыытта. Түмүккэ П.С. Скрябин аатынан орто оскуола коллектива кыайыылаах үрдүк аатын ылла, көһө сылдьар кубогынан наҕараадаланна.
Хас биирдии хамаанда олохтоох дьаһалта олохтообут бириистэрин ылан үөрүүлэрэ үксээтэ. «Балык былдьаһыы» диэн хатыйсыылаах, оҕо сааһы санатар күрэххэ хамаандалар үөрэ-көтө кытыннылар. Кыайыыны эмиэ орто оскуола коллектива ылла. Дьэ бу курдук, ыраас салгыҥҥа, «ЫРААС МУУС» тэрээһиммит бэрт көхтөөхтүк ааста. Кыттыыны ылбыттарга барыларыгар махтал. Ылыллыбыт ыраас муустара анал сайаапкаларынан, аҕа саастаах дьоҥҥо, байыаннай дьайыы кыттыылаахтарын дьиэ кэргэттэригэр сайаапканан тиэрдэллэр.
Мария Михайлова, «Сарыал» култуура киинин салайааччыта.