Өктөмҥө оскуола оҕолорун норуоттар икки ардыларынааҕы «Туймаада» ХХХI олимпиада саҕаланна.
Норуоттар икки ардыларынааҕы олимпиада ССРС норуотун учууталын Михаил Алексеев аатынан ыытыллар. Тэрээһин кэмигэр оҕолорго анаан араас экскурсиялар, култуурунай бырагырааммалар ыытыллыахтара.
— «Туймаада» оскуола оҕолоругар аналлаах норуоттар икки ардыларынааҕы олимпиада Бастакы Президеммит М.Е. Николаев көҕүлээһининэн ыытыллар. Манна сүрүн көрүҥнэринэн буолаллар математика, химия, физика уонна информатика. Казахстан уонна Румыния өрөспүүбүлүкэлэрэ хас сылын аайы кытталлар. Быйыл уопсайа 198 оҕо кэлэн кыттар. 77 оҕо Россия эрэгийиэннэриттэн, 77 оҕо Саха сириттэн кыттар уонна 44 тас дойдулартан кэллилэр. Бу барыта улахан сүүмэрдээһини ааспыт оҕолор. Олимпиада теоретическэй уонна практическэй түһүмэхтэргэ арахсар, сорудахтары сүрүн үөрэх кыһалара ыыталлар. Бу оҕолор үгүстэрэ билим өттүгэр үлэлии бараллар, онон олимпиадаттан элбэх ситиһиилээх учуонайдар тахсыбыттара, – диэн Василий Павлов СӨ Дьоҕус билим академиятын ректора кэпсээтэ.
«Туймаада» оскуола оҕолорун норуоттар икки ардыларынааҕы олимпиада кыттааччыларыгар Эркээни хочотун олохтоохторун аатыттан ситиһиини, кыайыыны баҕарабыт!
Татьяна Владимирова.