Тумул нэһилиэгэ Олохтоох көҕүлээһини өйүүр бырагыраамаҕа сылын аайы көхтөөхтүк кыттар. Былырыын бу бырагыраама чэрчитинэн дьаһалта, нэһилиэнньэ биир сүбэнэн чааһынай дьиэлэри киин ититэр ситимҥэ холбуур соруктаах матырыйаал ылбыттара. Быйыл күһүн оттук сезона саҕаланыан иннинэ улуустааҕы Олох-дьаһах хомунаалынай хаһаайыстыбата хочуолунайдарын уларытан оҥордулар, саҥа күүстээх хочуоллары туруордулар уонна алта дьиэҕэ тардыллан турар ититэр ситими реконструкциялаатылар. Кыстыгы көрсө биир дьиэ ОДьХХ хочуолунайыгар, өссө түөрт дьиэ Газстрой хочуолунайыгар холбоннулар.
— Ититии диэн хайа баҕар нэһилиэккэ тыын боппуруос буолар. Онон итии киирэр үөрүүлээх түгэнин элбэх ыал долгуйа кэтэһэн олорор. Былырыын Газстрой өйөбүлүнэн 1 км уһуннаах ититэр ситим тардыллыбыта, онно барыта 9 дьиэ холбоммута. Бу Олохтоох көҕүлээһини өйүүр бырагыраамаҕа кыттарбытыгар Ил Түмэн дьокутаата, «Якутцемент» салайааччыта Алиш Забид-оглы куруук спонсордаан улаханнык көмө буолар. Онон киниэхэ махталбыт улахан. Кэлэр сылга Олохтоох көҕүлээһини өйүүр бырагыраамаҕа эмиэ итии ситимин турбаларын ыларга диэн тумуллар биир санаанан быһаарынаммыт сайаапкабытын түһэрдибит. Нэһилиэккэ саҥа дьиэлэр тутуллаллар, дэриэбинэбит кэҥиир, онон кэлэр сылга 100% киин ситимҥэ холбонор былааннаахпыт, — диэн кылгастык нэһилиэк баһылыга Сахаяна Лукина кэпсээтэ.
Ольга Гермогенова.