#Ийэ тыл, сурук-бичик күнүгэр
Ийэ тыл уонна сурук бичик күнүн көрсө Хаҥалас улууһун “Арчы Дьиэтэ” норуот айымньытын киинэ уһуйаан оҕолоругар анаан тылы киллэрии сиэрин-туомун толорор үтүө үгэстээх.
Саха халандаарынан олунньу ый Одун Хаан Айыы ыйа. Өбүгэ үөрэҕэ этэринэн, 5 саастарын туолбут оҕолорго анаан, ийэ тылларын сайыннарар сыалтан, тылы киллэрии сиэрин-туомун толороллоро. Ол үтүө үгэһи салҕаан “Арчы Дьиэтэ” норуот айымньытын киинин алгысчыта, салайааччыта Лидия Харитонова сыл аайы Ийэ тыл, сурук-бичик күнүн көрсө уһуйааннарга сылдьан иитиллээччилэргэ турук Айыылартан кэс тылы иҥэринии сиэрин-туомун ыытар.
Быйыл Покровскай куорат “Сардаана” уһуйаанын сахалыы тыллаах иитиллээччилэрэ, барыта 45 оҕо, сахалыы таҥнан-симэнэн кэлэн иитээччилэринээн Антонина Егорованы, Зоя Галактионованы, Галина Федорованы кытта тэрээһиҥҥэ көхтөөхтүк кытыннылар.
Лидия Васильевна оҕолорго сахалыы халандаар хаамыытынан турук Айыылары билиһиннэрдэ, Айыы суолталарын сырдатта. Оҕолор Одун Хаан кэс тыллаах мэктиэ суругу туттулар. Тэрээһин оһуохайынан түмүктэннэ.
Тэрийээччи хараҕынан көрдөхпүнэ, оҕолор сахалыы бэркэ саҥарар буобуттар. Этэр тылбын болҕойон истэн хатылаатылар, сүргэлэрэ көтөҕүллэн үөрэн-көтөн бөлөхтөрүнэн тарҕастылар.
Инникитин баҕарыам этэ уһуйаан иитээччилэригэр сыралаах үлэлэригэр ситиһиилэри. Саха тыллаах буолан саха баар, онон ийэ тылбытынан уу сахалыы саҥаран-суруйан омук быһыытынан үүнэн-сайдан иһиэҕиҥ, оҕолорбут көхсүттэн көнтөстөрө төлөрүйбэтин, сиртэн ситимнэрэ быстыбатын, Айыы суолун батыһан саха буолан сандаардыннар, киһи буолан килбэйдиннэр! Биһиги оҕолорго анаан саастарынан Айыы үөрэҕинэн туомнары оҥоробут, онон инникитин Айыы үөрэҕин тарҕатар баҕалаах буоллаххытына уһуйааннар үлэһиттэрэ биһигинниин билсиҥ, үлэлэһэргэ өрүү бэлэммит.
Лидия Харитонова.
Хаартыскалары ааптар тиксэрдэ.