Муус устар 25 күнүттэн сааскы куһу угаайык куһунан бултуур көҥүллэнэн Хаҥалас улууһугар булчуттар кус кэтэбилигэр сыталлар. Булчуттар улуустааҕы инспекцияттан анал көҥүл ыланнар тахсыбыт ууларга, көлүччэлэргэ кус маныыллар.
Степан Кузьмин салайааччылаах улуустааҕы айылҕа харыстабылын инспекциятын үлэһиттэрэ Александр Бардеев уонна Артем Владимиров сааскы кэмҥэ булт быраабылатын кусчуттар төһө тутуһалларын бэрэбиэркэлээн рейдэҕэ сырыттылар.
Бөөлүүн кус көппөтө кэриэтэ, саа тыаһаабата, арай, куһу угаайылыырга анаан иитии кустар саҥалара, мээтиргииллэрэ иһиллэр. Инспекция үлэһиттэрэ пилота суох көтөр аппарааты көтүтэн ханна кусчуттар олороллорун үөһэттэн көрдүлэр. Булчуттар тыаҕа сылдьар кэмнэригэр ойуур баһаара тахсыбатын инниттэн кутааларын оттоллоругар уонна сааскы халаантан, улахантан ууттан сэрэхтээх буолаллара ирдэнэр. Рейдэ кэмигэр инспектордар кусчуттарга профилактика ыыттылар, анал бэчээттэммит матырыйааллары туттардылар.
Түүҥҥү рейдэ кэмигэр булт быраабылатын тутуспатах булчуттарга боротокуол толордулар, сааларын туттулар. Маннык рейдэлэр кэмиттэн кэмигэр ыытыллар буоланнар кусчуттар ортолоругар бэрээдэк тупсар.
Уйбаан Уйгуурап,
хаартыскаҕа: улуустааҕы айылҕа харыстабылын үлэһиттэрэ Артем Владимиров уонна Александр Бардеев рейдэ кэмигэр.