Россияҕа Аҕа, Саха сиригэр Ийэ күнүн көрсө
Россияҕа Аҕа, Саха сиригэр Ийэ күнүн көрсө Покровскайга П.Н. Харитонов-Ойуку аат. Киин бибилэтиэкэҕэ “Саха сирин кыһыл көмүс ыаллара” (“Золотые семьи Якутии”) – өрөспүүбүлүкэ дьиэ кэргэнин нэһилиэстибэтин лиэтэпиһин 9-с таһаарыытын биһирэмэ буолла.
Санатан эттэххэ, кинигэ бастакы таһаарыыта 2008 сыллаахха, Дьиэ кэргэн сылыгар ананан бэчээттэммитэ. Бу Саха өрөспүүбүлүкэтин бырабыыталыстыбатын, Үлэҕэ министиэристибэтин өйөбүлүнэн гражданскай турук аакталарын бэлиэтээһин управлениета бэлэмнээн таһаарар дьоһун бырайыага буолар. Манна 50 сылтан тахса бииргэ олорбут, үгүс сылларга тапталларын уонна бэйэ-бэйэлэрин харыстаһан кэлбит, эдэр көлүөнэҕэ олоххо муударастарын уонна баай духуобунай, майгы-сигили өрүттэрин биэрбит, оҕолорун дьоһун дьон гына иитэн, үөрэтэн таһаарбыт, өрөспүүбүлүкэ социальнай-экономическай сайдыытыгар кылааттарын киллэрбит ыаллар киирэллэр.
Биир маннык кинигэҕэ 100-чэкэ ыал киирэр, оттон бу тохсус таһаарыыга Хаҥалас улууһуттан уопсайа 28 дьиэ кэргэн олоҕо-дьаһаҕа, дьылҕата кэпсэнэр. Кинигэҕэ киирбит дьоруойдары — Татьяна Александровна уонна Сергей Васильевич Беспутиннары, Евдокия Ивановна уонна Григорий Григорьевич Григорьевтары, Мотрена Семеновна уонна Игнатий Васильевич Ивановтары, Екатерина Семеновна уонна Данил Данилович Киприяновтары, Людмила Николаевна уонна Николай Васильевич Пшенниковтары, Надежда Михайловна уонна Валерий Петрович Федоровтары уо.д.а. СӨ бырабыыталыстыбатын иһинэн гражданскай турук аакталарын бэлиэтээһин управлениетын Хаҥаластааҕы салаатын салайааччы Татьяна Елисеева, Хаҥалас улууһун дьаһалтатын социальнай политикаҕа салаатын начаалынньыга Наталья Григорьева эҕэрдэлээтилэр.
— Хаҥалас улууһугар өр сыл бииргэ олорор ыалларбыт ахсааннара сылтан сыл элбиир. Ол курдук, 2024 сыллаахха 34 дьиэ кэргэн кыһыл көмүс сыбаайбаларын бэлиэтээбиттэрэ, былырыын – 42, быйыл номнуо 50-тан тахса ыал. Ону сэргэ, үйэ аҥарыттан ордук сыл бииргэ олорор ыалларбыт ахсааннара 100-тэн тахса буолла. Бу көрдөрүү өссө тупсан иһиэ диэн эрэнэбит. Хас биирдии ыал сүрүн баайа – кинилэр оҕолоро. Элбэх оҕону төрөтө-иитэн улаатыннартыыр ыалларбыт эмиэ эбиллэллэр, күн бүгүн улууспутугар элбэх оҕолоох ыал аатын 1600-тэн тахса дьиэ кэргэн сүгэр. Аҕыйах хонуктааҕыта Булгунньахтаахтан Давыдовтар дьиэ кэргэннэрэ онус оҕолоннулар, онон ыал ийэтигэр Герой-ийэ аата иҥэриллэрин ситиһиэхпит. Хас биирдии ытык ыалларбытыгар нус-хас олоҕу, чэгиэн туругу баҕарабыт! — диэн Наталья Григорьева эҕэрдэ тылыгар бэлиэтээн эттэ.
Бу тэрээһиҥҥэ кыттыбыт дьоһун ыалларбыт ааттарыттан 1-кы Малдьаҕар нэһилиэгин биир сис ыала, 58 сыл эйэ-дэмнээхтик бииргэ олорор Екатерина Семеновна уонна Данил Данилович Киприяновтар тыл эттилэр.
— Биһиги Бастакы президеммит Михаил Ефимович Николаев дьиэ кэргэҥҥэ, оҕону иитиигэ улахан болҕомто уурара уонна элбэх оҕолоох ыаллар баалларын тухары дойдубут үүнүө-сайдыа диирэ. Онон инникитин эдэр көлүөнэ биһиги холобурбутунан эмиэ элбэх оҕолонон, үтүө-мааны дьону иитэн таһаартааҥ, — диэн улахан дьиэ кэргэн аҕата алгыһын эттэ.
Ольга Гермогенова.
Ааптар хаартыскаҕа түһэриитэ.
