Россия Президенин талыы быыбара бүтүн дойду үрдүнэн олус тэрээһиннээхтик 3 күн устата ыытылынна. Биһиэхэ Саха сиригэр, чуолаан Хаҥалас улууһугар, урукку сылларга тэҥнээтэххэ дьон быыбарга көхтөөхтүк кытынна. Мин үйэм тухары тыа хаһаайыстыбатыгар үлэлээн кэлбит киһи быһыытынан эттэхпинэ, биһиэхэ Сахабыт сиригэр бу тыа хаһаайыстыбатын салаатын өйүүргэ атын эрэгийиэннэрдээҕэр элбэх көмө, өйөбүл оҥоһуллар. Судаарыстыба өттүттэн тыа сирин үлэлээн иитиллээччилэригэр хайаан да өйөбүл баар булуохтаах. Билигин үлэлии сылдьар дьон сааһырдылар, оттон ыччат дьон тыа сиригэр таласпаттар. Бу кыһалҕаны кэлимник быһаарарга кэмэ кэллэ.
Быыбар кэмигэр өстөөхтүү санаалаах тас дойдулар араас мэһэйдэри оҥоро сатаатылар да кыайбатылар. Онон, этэргэ дылы, Владимир Путин баар, Россия баар!
Анал байыаннай дьайыы буола турар сиригэр өссө кытаанах дьаһаллары ылара буоллар дии саныыбын. Билигин биһиги Россияҕа олорор 100-тэн тахса омук сомоҕолоһон, биир иллээх дьиэ кэргэн курдук олоруохтаахпыт, үлэлиэхтээхпит-хамсыахтаахпыт. Президеммит Владимир Путин күүстээх салайааччы, мин кинини ис сүрэхпиттэн өйүүбүн.
Түмүктээн эттэххэ, бүгүн аны саас ыһыахтаах сиэмэ бурдугум кэлэн, уйгу-быйаҥ сайын буоллар диэн баҕа санаалаахпын.
Роман Куприянов, РФ үтүөлээх механизатора, РФ агропромышленнай комплексын үтүөлээх үлэһитэ.