Хачыкаат нэһилиэгин Кыһыл Үрүйэтигэр саламанан симэммит, чэчиринэн чэлгийбит, уйгу-быйан олбохтоох, үөрүү-көтүү үктэллээх, Россия Норуоттарын сомоҕолоһууларын, Саха сиригэр Култуура, Хаҥалас улууһугар Сомоҕолоһуу уонна айан-тутан түмсүүлээх буолуу сылларыгар, Кыһыл Үрүйэҕэ үөрэхтээһин тэриллибитэ 85 сылынан, саха норуотун уус-уран баайын чыпчаала буолбут улуу Олоҥхобут аһаҕас халлаан анныгар турбута 90 сылыгар анаммыт үрүн тунах ыһыахпыт буолан ааста.
Күн санаа көччүйдүн диэн өбүгэлэрбит үйэлээх үгэстэринэн түптэ буруотун унаарытан, ситимин тардан, үгэс быһыытынан олохтоох алгысчыт Владимир Герасимов былыргыттан тэнийэн кэлбит сиэри тутуһан сайыны уруйдаан арчылаах алгыһы түһэрдэ. Людмила Максимова алгыс оһуохайы таһаарда. Үрүҥ тунах ыһыаҕынан Хачыкаат нэһилиэгин баһылыга Ирина Оболкина эҕэрдэ тыл эттэ.
Саха норуотун тылынан уус-уран чыпчаала буолбут улуу Олоҥхону Кыһыл Үрүйэҕэ куруһуок тэрийэн төрүттээбит олоҥхоһуттарбыт ааттарын ааттаан, ахтан-санаан аастыбыт. Ол кэннэ кэнчээри ыччаппыт, Хачыкааттан Дима Сулейманов «Модун эр Соҕотох”, Кыһыл Үрүйэттэн “Үрүйэчээн” театральнай куруһуок оҕолоро (салайааччы Людмила Артамонова) “Ойор тэбэр аттаах Оҕо Бочоох бухатыыр” олоҥхолортон быһа тардан, Хачыкааттан сыана бэтэрээнэ Николай Максимов “Ньургун Боотур” олоҥхоттон Сорук Боллур оруолун толорон дьон биһирэбилин ыллылар.
Олохтоохтор уонна Кыһыл Үрүйэттэн төрүттээхтэр кэнсиэр көрдөрдүлэр, бииртэн биир кэрэ куоластаах ырыаһыт кыргыттар, нэһилиэк “Сарыал” үҥкүүһүт далбардара, үүнэр күлүөнэ ыччаттарбыт ыллаан-туойан сайыны уруйдаатылар.
Бу бэлиэ күн олохтоох кыргыттарбыт Лилия Федорова (Прокопьева) дьүрүлүгэр, Дыдаев тылларыгар «Өр сыллаах ахтылҕаным», Надежда Лиханова тылларыгар, Лилия Федорова дьүрүлүгэр “Дьүөгэлэрбэр”, Аркадий Протодьяконов тылларыгар, Андриан Егоров дьүрүлүгэр «Кыракый уолчааным», ыалдьыппыт Байдам Дайыына Сииҥкэ кыыһа тылларыгар, Елена Ильина-Намчы дьүрүлүгэр «Ситиһии, табыллыы таарыйдын» диэн саҥа ырыаларын сүрэхтээбиттэрэ, дьон биһирэбилин ыллылар.
Үгэс быһыытынан “Саха мааны таҥаһа”, “Оһуордаах оһуохай үҥкүүтэ”, спортивнай оонньуу күрэхтэрэ ыытылыннылар. Кыһыл Үрүйэҕэ үөрэхтээһин тэриллибитэ 85 сылынан оскуолабыт лоторея оонньотон быйылгы ыһыахтан дьон өттүк харалаах, илии тутуурдаах, сүргэлэрэ көтөҕүллэн тарҕастылар.
Людмила Артамонова, Кыһыл Үрүйэ с.
