Ийэ күнүн көрсө
Соторутааҕыта өрөспүүбүлүкэҕэ «Новые голоса» саҥа талааннары арыйар бырайыак түмүктэннэ. Бу ырыа куонкуруһугар Хаҥалас улууһуттан СӨ култууратын туйгуна, Светаслава диэн айар аатынан биллэр Светлана Неустроева бэрт ситиһиилээхтик кытынна, күрэх финалистката буолла. Светаслава – кини кимий?
— Амма улууһун Алтан нэһилиэгиттэн төрүттээхпин. Аҕам Иннокентий Алексеевич Неустроев улахан дьиэ кэргэҥҥэ төрөөбүт киһи, бииргэ төрөөбүттэр 15 оҕо. Ийэм Евдокия Гаврильевна профессиональнай техническэй үөрэхтээһин эйгэтигэр үлэлээбитэ, педагог. Онон мин ырыа-тойук аргыстаах Неустроевтар музыкальнай династияларын бэрэстэбиитэллэрэ буолабын. Дьокуускайдааҕы култуура уонна искусство колледжын эстрада отделениетын үөрэнэн бүтэрбитим, идэбинэн эстрада артыыһа уонна вокальнай кэлэктиип салайааччыта буолабын. Билигин Покровскайга «Саргы түһүлгэтэ» Култуура киинигэр айар жанр испэсэлииһинэн үлэлиибин уонна «Элегия» эстраднай студияны салайабын, — диэн Светлана кэпсэтиибитин бэйэтин билиһиннэрииттэн саҕалаата.
— Светлана, култуура эйгэтигэр соһуччу кэлбэтэх киһигин, онон хаһааҥҥыттан ырыанан дьарыктанаҕыный?
— Оҕо эрдэхпиттэн ырыа ыллыырбын өйдүүбүн. Мин бастакы учууталым, музыкаҕа уһуйааччым аҕам буолар. Кини миэхэ сахалыы ырыаҕа тапталы иҥэрбитэ, Валерий Ноев ырыаларын ыллыырга үөрэппитэ. Алта саастаахпар «Тулуйхан» вокальнай студия салайааччылара Светлана уонна Егор Неустроевтар мин дьоҕурбун бэлиэтии көрбүттэрэ, ол кэмтэн ырыанан чиҥник дьарыктанан саҕалаабытым. Оскуолаҕа үөрэнэр кэммэр элбэх куонкурустарга кыттарым. 2003 сыллаахха 11 кылааска үөрэнэ сылдьан «Туой хайа» куонкуруска кыттан Гран-при ылбытым. Бу мин айар үлэбэр улахан ситиһиим уонна истиҥ өйдөбүлү хаалларбыт бэлиэ күннэрбиттэн биирдэстэрэ буолар. Устудьуоннуу сылдьан Пермь куоракка ыытыллыбыт «Студенческая весна» куонкуруска I истиэпэннээх лауреат буолбутум. Колледжпын ситиһиилээхтик бүтэрэн Государственнай Эстрада тыйаатырыгар үлэлээбитим. 2010 сыллаахха Аркадий Алексеев аатынан «Ыллаа-туой, эдэр саас!» куонкурус Гран-при кыайыылааҕабын, 2012 сыллаахха «С песней по Азии» норуоттар икки ардыларынааҕы куонкурус Гран-при лауреата буолбутум, «Саҥа ырыа» телевизионнай бырайыак кыттыылааҕабын. Быйыл «Новые голоса» кыттан финалга таҕыстым.
— Култуура эйгэтигэр үлэ элбэх бириэмэни уонна күүһү ылар буоллаҕа…
— Оннук ээ, кэнсиэртэр, тэрээһиннэр, куонкурустар, бэлэмнэниилэр — барыта дьиссипилиинэни уонна эппиэтинэһи ирдииллэр. Ол эрээри дьиэ кэргэним, оҕолорум хаһан баҕарар инники күөҥҥэ тураллар, онон кинилэргэ бириэмэ булан, сөптөөх болҕомто уураргадьулуһабын. Кыргыттарым Покровскай 2-с №-дээх орто оскуолатыгар үөрэнэллэр —улаханым Амелия 11-с кылааска, Эвелина 2-скэ, кырам Күндүл «Сардаана» оҕо саадыгар сылдьар. Оҕолорум, дьиэ кэргэним — мин олоҕум баайа, күүстээх буолар сүрүн тирэҕим. Бэйэм оҕо эрдэхпиттэн таптыыр дьарыкпын идэ оҥостон үлэлиир буоламмын оҕолорбун эмиэ үлэни таптыырга, төрөөбүт тылбытыгар, култуурабытыгар тапталы иҥэрэн иитэ сатыыбын.Оҕолорбор сөптөөх холобур буоларым миэхэ улахан суолталаах.
— Элбэх оҕолоох киһи оҕону иитиигэ туох сүрүн ирдэбиллээххиний?
— Бастатан туран таптал, болҕомто, бэйэ-бэйэҕэ истиҥ сыһыан, өйөбүл, убаастабыл уонна эппиэтинэс баар буолуохтаах. Оҕо санаатын аһаҕастык этэр, ыйытыы биэрэр, бэйэтин күүһүгэр эрэнэр буолуохтаах дии саныыбын. Мин оҕолорум үһүөн тус-туспа майгылаахтар, интэриэстээхтэр.Амелиям художественнай көрүүлээх, омук тылын интэриэһиргиир, инникитин дизайнер буолуон баҕарар. Оттон Эвелина Оҕо искусствотын оскуолатыгар фортепиано салаатыгар үөрэнэр, «Эркээни эдэр сааһа» үҥкүү ансаамбылыгар дьарыктанар, Күндүл — уол уол курдук,ордук спорду интэриэһиргиир. Онон оҕолорум бэйэлэрин ис кыахтарын арыйалларыгар өйөбүл, интэриэстэрин сайыннаралларыгар тирэх буоларга дьулуһабын.
Ольга Гермогенова.
Хаартыска Светлана Неустроева тус архыыбыттан.