Хаҥаласка Саха тылын күнүгэр аналлаах «Ытык Чыыбыстаан» норуот тылынан уус-уран айымньытын өрөспүүбүлүкэтээҕи күрэҕэ буолан ааста. 96 сайаапка киирэн айар-тутар, ыллыыр туойар дьоҕурдаах 263 киһи кытынна, Намтан, Горнайтан, Амматтан Тааттаттан, Дьокуускай куораттан,  Хаҥаластан — 2-Дьөппөн, Хачыкаат, Мохсоҕоллоох, Булгунньахтаах, Өктөм, Улахан Аан, Нөмүгү, Уулаах Аан, Сиинэ дьоно.

Түмүккэ – «Кылаан чыпчаал» ааты Нөмүгүттэн Пелагея Семенова ылла.

Оҕолорго саастарынан Муҥутуур кыайыылаахтар быһаарылыннылар. 2-Дьөппөнтөн сылдьар, Айыы кыһатыгар үөрэнэр Эрик Егоров бэйэтин сааһыгар Муҥутуур кыайыылаах буолла, уһуйаас саастаахтарга Покровскай куорат«Сардана» уһуйаан иитиллээччитэ Айсан Слепцов бастаата.

Сиинэ да нэһилиэгин оҕолоро хаалсыбатылар, этно-фольклорнай куруһуок иитиллээччилэрэ, «Кэскил» бөлөх, иккис үрдэлгэ таҕыста.  «Кэнчээри» бөлөхүһүс, ону таһынан биирдиилээн кыттааччылар ситиһиилэннилэр — тойукка Саасчаана Никодимова бастаата, Мэҥэ сурук тутта, олоҥхоҕо Айыына Спиридонова бастакы үрдэлгэ тахсан Добун сурук тутта.

Дьүүллүүр сүбэҕэ Хаҥаластааҕы Арчы диэтин дириэктэрэ, култуура үтүөлээх үлэһитэ Лидия Харитонова, СӨ култууратын туйгуннара Александра Васильева, Андриан Егоров, Александр Саввинов үлэлэстилэр.

Бу култуура үлэһитэ Изольда Максимова бырайыагынан ыытыллыбыт күрэх үрдүк таһымнаахтык ааста. Маннык тэрээһин ыытыллара, саха төрүт үгэстэрэ үйэттэн-үйэҕэ кэлэн кэнчээри ыччаттарга тарҕанара олус кэрэхсэбиллээх.

Аксинья НИКОДИМОВА, Сиинэ нэһ.