Үөдэйгэ олохтоох нэһилиэнньэ көҕүлээһининэн ыһыахтыыр сир саҥардыллар

Олохтоох көҕүлээһини өйүүр бырагыраама өрөспүүбүлүкэбитигэр 2017 сылтан үлэтин саҕалаабыта, онтон ыла хас улуус аайы нэһилиэктэр, куораттар көхтөөх кыттыыны ылан нэһилиэнньэ баҕатын олоххо киллэрэллэр.

4-с Малдьаҕар нэһилиэгин олохтоохторо бу бырагыраамаҕа сылын аайы көхтөөхтүк кытталлар, бэйэлэрин санааларын-баҕаларын этэн, ону толорорго биир киһи курдук кыттыһаллар. Бу күннэргэ Үөдэйгэ Быһаҕас диэн сиргэ ыһыахтыыр түһүлгэни тупсаран, саҥардан оҥоруу үлэтэ бара турар.

— Ыһыахтыыр сирбитин тупсарыахха наада диэн нэһилиэкпит дьоно-сэргэтэ туруорсан Олохтоох көҕүлээһини өйүүр бырагыраамаҕа кыттыбыппыт. Бырайыакпыт кыайыылаах буолан уопсайа 2 635 тыһ. солкуобай суумалаах үлэни саҕалаатыбыт. Бырагыраама ирдэбилинэн нэһилиэнньэ 49 тыһ. солкуобайы кыттыста уонна 300 тыһ. солкуобай сууммалаах улахан көмөнү дьокутааппыт Алиш Мамедов оҥордо.

Күн бүгүн бэйэбит уолаттарбыт мустан алта биригээдэҕэ арахсан түһүлгэ эбийиэктэрин тута сылдьаллар. Ол курдук, бырайыагынан күрүө, «Аан Аартык” түһүлгэҕэ киирии, ураһа, сиэр-туом ыытарга кымыс баҕаҕа, холумтан, ыалдьыттар олорор сирдэрэ, хорчуоппалар, спортивнай оонньуулар ыытыллар сирдэрэ, оҕо оонньуур былаһаакката, сыана саҥаттан тутуллар. Тутуу матырыйаалын барытын саас эрдэ, суол баарына таһаарбыппыт. Бэс ыйын 10 күнүгэр биригээдэлэр үлэлэрин туттарыахтара уонна бэс ыйын 12-гэр саҥардыллыбыт түһүлгэбитигэр «Уруйдан үтүө сыл, айхаллан кэрэ кэм» нэһилиэкпит ыһыаҕын тэрийиэхпит, — диэн 4-с Малдьаҕар нэһилиэгин баһылыга Николай Осипов иһитиннэрдэ.

Ольга Гермогенова.

Читайте дальше