“Азия оҕолоро” VIII-с оонньуулары көрсө
“Азия оҕолоро” VII Норуоттар икки ардыларынааҕы спортивнай оонньуу уота 2022 сыллаахха бэс ыйын 24 күнүгэр «Өлүөнэ очуостара» Национальнай пааркаттан ылыллыбыта. Онтон салгыы Оонньуу уотун эстафетата Приморскай кыраай куораттарынан, бөһүөлэктэринэн ааһан от ыйын 28 күнүгэр Владивосток куоракка тиксэриллибитэ.
“Азия оҕолоро” VII оонньуулар от ыйын 27 күнүттэн атырдьах ыйын 8 күнүгэр диэри Владивостокка ыытыллыбыттара. Кыттааччылар уопсай ахсааннара 3 тыһ. тахса киһи этэ. Күрэхтэһиигэ 13-16 саастаах спортсменнар кыттыбыттара. Барыта19 көрүҥҥэ 273 комплект мэтээл оонньоммута, 12 дойдуттан уонна Россия 8 эрэгийиэниттэн барыта 1355 спортсмен кыттыбыта.
Сибиирдээҕи федеральнай уокурук 45 кыһыл көмүс, 38 үрүҥ көмүс, 36 боруонса мэтээли ылан бастакы миэстэҕэ тиксибитэ. Иккис миэстэ Узбекистан хамаандата (41 кыһыл көмүс, 28 үрүҥ көмүс, 45 боруонса мэтээллээх) буолбута. Оттон Москва хамаандата 31 кыһыл көмүс, 38 үрүҥ көмүс, 41 боруонса мэтээли ситиһэн үһүс миэстэни ылбыта. Саха сирин хамаандата 37 мэтээллээх (12 кыһыл көмүс, 10 үрүҥ көмүс, 15 боруонса), алтыс миэстэҕэ тиксибитэ.
Василий МОЖУКОВ.