«Өрөспүүбүлүкэбит ытык дьоно» диэн сиэрийэнэн тахсар кинигэлэр ахсааннарыгар бэртээхэй эбиллии буолла. Арассыыйа таһымнаах общественнай-политическай диэйэтэл, Арассыыйа уонна Саха өрөспүүбүлүкэтин таһымнаах норуот дьокутаата З.А. Корнилова туһунан кырдьыктаах, дьоһуннаах докумуоннарга уонна Зоя Афанасьевналыын бииргэ үлэлээбит дьон ахтыыларыгар олоҕуран суруллубут историческай-документальнай кинигэ дьон болҕомтотун тардарыгар саарбахтааһын суох.
Кинигэни таҥан, редакциялаан таһаардылар А.Д. Ноговицына, Ю.М. Николаев, А.А. Кугаевскай, Н.Н. Харбин, М.К. Илларионова, Н.Р. Попова, Т.Р. Тармаева, М.К. Колесова. Киирии тылы Саха өрөспүүбүлүкэтин Ил Дархана А.С. Николаев уонна Ил Түмэн Судаарыстыбаннай Мунньах бэрэссэдээтэлэ А.И. Еремеев суруйбуттар.
З.А. Корнилова 1990 с. дьиҥ чахчылаах демократическай быыбарга кыайыылаах тахсан РСФСР XII ыҥырыылаах Үрдүкү Сэбиэтин дьокутаатынан буолбута. Зоя Афанасьевна саха киһитэ чарапчыланан көрө илик улахан дуоһунаһын, ол курдук РСФР Үрдүкү Сэбиэтин президиумун чилиэнэ диэн Россия бырабыыталыстыбатын бэрэссэдээтэлин солбуйааччытын дуоһунаһыгар тэҥнэһэр, сүдү улахан солону сүкпүтэ, эппиэтинэстээх үлэҕэ талыллыбыта.
Зоя Афанасьевна норуот итэҕэлинэн, быыбарданан талыллыбыт РСФСР Үрдүкү Сэбиэтигэр, РФ Госдуматын иккис ыҥырыылаах мунньаҕар уонна Саха өрөспүүбүлүкэтин Судаарыстыбаннай Мунньаҕар Ил Түмэҥҥэ II, III, IV ыҥырыыларыгар номоххо киирэрдии чаҕылҕайдык, хорутуулаахтык, туһалаахтык үлэлээн ааспыта диирим тутах, быһаҕас буолара дуу?
Зоя Корнилова үлэлээбит үлэтэ, олоххо киллэрсибит сокуоннара, аакталара улуу Арассыыйа олоҕор-дьаһаҕар мэлдьи туһалыы-дьайа туруохтара диэн кини соратниктара, биир санаалаахтара ахтыыларыгар олус бэркэ суруйбуттарын астына-дуоһуйа, киэн тутта аахтым. Зоя Афанасьевна саха дьахталларыттан аан бастакынан экэниэмикэ билимин учуонайа, РСФСР үтүөлээх экономиһа буолбута. РСФСР наукаларын академиятын дьиҥнээх (действительнай) чилиэнэ, Социалистическай Үлэ дьоруойа Н.В. Черскэй саха учуонайдарыттан З.А. Корнилованы үрдүктүк сыаналыырын истибитим.
Зоя Афанасьевна олоҕун, үлэлээбит үлэтин сырдатар-билиһиннэрэр кинигэҕэ ахтыыларын суруйбуттар – Н.И. Рыжков (1985-1990 сс.) ССРС министрдэрин Сэбиэтин бэрэссэдээтэлэ, Р.И. Хасбулатов РСФСР Үрдүкү Сэбиэтин 1991-1993 сс. бэрэссэдээтэлэ, Г.Н. Слезнев Судаарыстыбаннай Дума II уонна III ыҥырыылаах мунньаҕын бэрэссэдээтэлэ. Өрөспүүбүлүкэбит салайааччыларыттан ахтыыларын суруйбуттар В.А. Штыров, Е.А. Борисов, А.Н. Жирков, Г.И. Данчикова, А.В. Кривошапкин, К.Е. Иванов, А.К. Акимов, А.З. Мамедов, Е.Х. Голомарева, В.М. Власов, Ю.М. Николаев уо.д.а. кинигэҕэ 70-тан тахсар киһи ахтыыларын суруйбуттар. Кинигэлэри, сурунааллары, дакылааттары, ыстатыйалары, интервьюлары, бырагыраамалары, мунньан нүөмэрдээн эридьиэстээбиттэрэ 535 ахсааҥҥа тиийбит. Электроннай сыһыарыылар тоҕустар. Зоя Афанасьевна олус аккуратнай, киэҥ билиилээх-көрүүлээх киһи буоларынан суруйбута-муспута элбэх бөҕө буоллаҕа… Уонна улахан политикаҕа сылдьар диэйэтэл быһыытынан мэлдьи бигэ уонна кытаанах көрдөрүүлэргэ олоҕуран кэпсэтэр-быһаарсар быраабылалаах буолара. З.А. Корнилова туһунан кинигэ – ааҕааччы киэҥ эйгэтигэр-араҥатыгар ананар диэн суруктаах.
Ермолай Скрябин.
Хаартыска интернет ситимиттэн.