Альберт Владимирович Мордовской биһигини физкультураҕа уонна ОБЖ-га үөрэтэр. Былырыын “Графический дизайн” диэн предмеккэ үөрэппитэ. Оскуолаҕа төһө да аҕыйах сыл үлэлээтэр, оҕолор кинини олус сөбүлээтилэр. Альберт Владимирович сымнаҕас, бэһиэлэй, кэпсэтинньэҥ, кимниин баҕарар уопсай тыл булар, үөрэ-көтө сэһэргэһэр.
Мин саамай сөбүлүүр уруогум кыра кылаастан физкультура уруога. Учууталым куруук этэр — спордунан дьарыктанар киһи хаһан даҕаны охтон биэрбэт, бэйэтин көрүнэр, мээнэ ыалдьыбат. Кини уруогун быһаарара олус үчүгэй, киһи тутатына өйдүүр. Оҕолору мээнэ мөхпөт. Мөҕөр да буоллаҕына, ол аата эн тугу эрэ сыыһа оҥорбуккун эбэтэр олох атыҥҥа аралдьыйа олороҕун.
Альберт Владимирович волейболлуурун сөбүлүүр, бэйэтэ нэһилиэккэ, улууска оонньуур. Ол иһин биһигини, уолаттары, бу көрүҥҥэ дьарыктаабыта. Биһиги элбэх күрэхтэһиигэ кыттыбыппыт, уопут бөҕө ылбыппыт. Альберт Владимирович сүбэтин ылынан, волейбол кистэлэҥин өйдөөн, билигин даҕаны бу сөбүлүүр спорт көрүҥүнэн дьарыктана сылдьабын, элбэх күрэхтэһиигэ кыттабын.
Оскуолабытыгар “Малдьаҕар сиэннэрэ” патриотическай кулууп иккис сылын үлэлиир. Эр дьон учууталлар оскуола уолаттарын этэрээттэргэ араарбыттара. Альберт Владимирович этэрээтэ араас тэрээһиннэргэ көхтөөхтүк кыттар. Салайааччы эппит тылыттан уолаттар тахсыбаттар.
Баҕарыам этэ учууталбар Альберт Владимировичка өссө да өр сылларга оскуолаҕа бэриниилээхтик үлэлииригэр, оҕолору элбэххэ үөрэтэригэр. Мэлдьи үөрэ-көтө сырыттын, доруобай буоллун.
Влад Афанасьев, М.Е.Васильева аатынан 2-c Малдьаҕар орто оскуолатын 9 кылааһын үөрэнээччитэ.