Дьокуускай куораттан ытык киһибитин аара Хаҥалас улууһун кыраныыссатыгар, хаҥаластар ытык Хотойдорун стелатын, салгыы Төхтүр нэһилиэгин, Өктөмҥө кэлиигэ олохтоохтор сэлэлии туран көрсөн атаардылар. Чапаев сэлиэнньэтигэр Наука дьоҕус академиятын саалатыгар Михаил Николаевы тиһэх суолугар атаарыы миитинэ буолла.
Кылгастык олоҕун туһунан билиһиннэрии кэнниттэн Россия президенэ Владимир Путин Михаил Николаев олохтон барыытынан чугас дьонугар, Саха сирин олохтоохторугар кутурҕанын биллэрэр, ытык киһибит дойду сайдыытыгар кылаатын туһунан телеграмматын ааҕан иһитиннэрии кэнниттэн Саха Өрөспүүбүлүкэтин Баһылыга Айсен Николаев тыл эттэ.
Кини Михаил Ефимович Сахабыт сирин саҥа историческай кэрчик кэмҥэ олоҕун, общественнай улахан таһымнаах үлэтин туһунан сырдатта, дойдубут государственноһа бөҕөргүүрүгэр, экономическай, социальнай сайдыытыгар сүдү өҥөтүн, бэлиэтээтэ.
Кини Бастакы Президеммит саҕалаабыт үлэтэ салҕаныа, ытык аата үйэлэргэ ааттаныа диэтэ.
Салгыы СӨ Государственнай Мунньаҕын салайааччыта Алексей Еремеев тыл эттэ, Михаил Николаев дойду олоҕун оҥкула уларыйар кэмигэр Сахатын сирин кэскилин туһуттан хорсуннук бастакынан дьоһуннук, итэҕэтиилээхтик туруорсан саҥа Россия Федерацията атаҕар туруутугар улахан үлэни ыыппытын бэлиэтээтэ.
РФ Государственнай Дууматын Федерация Сэбиэтин салайааччыта Валентина Матвиенко, РФ Бырабыыталыстыбатын бэрэссэдээтэлэ Михаил Мишустин, о.д.а. дойду салайааччыларын телеграммаларын иһитиннэрдилэр. Истиҥ тылынан Михаил Ефимовиһы РФ сенатора Егор Борисов, Государственнай сүбэһит Андрей Борисов, Хаҥалас улууһун баһылыга Олег Иринеев, СӨ каадырдары бэлэмнээһиҥҥэ департамент урукку салайааччыта Матвей Мучин, АЛРОСА хампаанньа аатыттан Игорь Соболев, Хаҥаластан норуот дьокутаата Алиш Мамедов, Бастакы Президеммитин ахтан аһардылар, музыка үрдүкү оскуолатын выпускницата Ирина Догуева, махтал Саха сирин дьонугар-сэргэтигэр, өрөспүүбүлүкэ салалтатыгар Михаил Ефимович кыыһа Ольга Андросова анаата о.д.а.
Михаил Николаевы Чапаев сэлиэнньэтигэр Троицкай таҥара дьиэтигэр православнай итэҕэлинэн сиэри-туому толорон төрүт сиригэр биир дрйдулаахтарын кытары махталлаах Сахабыт сирин общественноһа атаарда. Махтал тыллары 65 сыл бииргэ олорбут кэргэнэ Дора Никитична бар дьонугар эттэ. Быраһаай, ытык киһибит, Михаил Ефимович!
Людмила Аммосова, «Хаҥалас» хаһыат