«Музыка барыбытыгар»
Бастакы Президеммит, духуобунай лидербит Михаил Николаев кэскили өтө көрөн саҥа көлүөнэ сайдыытыгар улахан болҕомтону уурбута. Кини көҕүлээбит “Музыка барыбытыгар” бырайыага олохпутугар бигэтик киирдэ, оҕо айар-тутар, сайдар хамсааһынын символынан, тумус туттуутунан буолла.
Искусство оскуолалара үлэлэрин кэҥэтэллэр. Бырайыак хайа саҕаланыаҕыттан биһиги үөрэхпит кыһалара оҕо уһуйааннарын, уопсай үөрэхтээһин оскуолаларын кытары үлэни ыкса саҕалаабыта. Преподавателлэрбит методическай уонна практическай көмөнү оҥороллор, араас күрэстэри ыытыыга, олимпиадаларга кытталлар.
Михаил Ефимовичтыын хас биирдии көрсүһүү биһигини духуобунай өттүнэн байытар буолара, музыкаҕа, айар-тутар эйгэҕэ оҕону кыра сааһыттан сыһыарыы кини толкуйдуур дьоҕурун сайыннарарыгар суолталааҕын бэлиэтиирэ. “Музыка барыбытыгар” бырайыак Сахабыт сиригэр музыкальнай кластердар тэриллиилэригэр олук уурбута. Өссө 2021 сыллаахха Покровскайдааҕы искусство оскуолатыгар тирэҕирэн Хаҥалас, Нам, Горнай, Кэбээйи улуустарын хабар Киин музыкальнай кластер үлэтин саҕалаабыта, олимпиадалар ыытыллан барбыттара. Түмүктэрэ үөрдэр, уопуппут салгыы тарҕанар.
Ол курдук, быйыл бэс ыйын 23 күнүгэр Дьокуускайга “Музыка для всех: вектор развития второго десятилетия” диэн стратегическай сессия буолан ааста. Тэрээһин министиэристибэлэр, оскуолаларбыт преподавателлэрин түмтэ уонна сүрүн Киин, Дьокуускайдааҕы, Илин эҥэрдээҕи уонна Бүлүү музыкальнай кластердарын бэрэстэбиитэллэрин түмтэ, уопут атастаһыыта буолла, инники соруктар торумнаннылар. Манна уруккуттан биһигини кытары сибээһи тутар Санкт-Петербургдааҕы Н.А.Римскай-Корсаков аатынан консерватория профессора, искусствоведение дуоктара, Н.А.Бергер, “Молодая гвардия” кинигэ кыһатын кыл. редактора М.К.Залесская кэлэ сылдьан Саха сирин музыканнарын ис кыаҕын таһыма үрдүгүн, музыкальнай искусствоны оҕо уонна ыччат литературатын уонна медиа нөҥүө тарҕатарга соругу, эдэр ааптардары, талааннаах ыччаты өйүүргэ болҕомтону туһаайыыга санааларын тириэртилэр.
Михаил Ефимович биир көрсүһүүгэ Кытай Народнай Өрөспүүбүлүкэтин посола «Музыка барыбытыгар” бырайыакка анаммыт “Москва-Дьокуускай” телемостка эппит тылын умнубаппыт – Кытай куораттардааҕы оскуолаларыгар үөрэнээччилэрин 95, онтон тыа сирдэригэр 75 бырыһыаннара музыкальнай, художественнай уонна саахымакка үөрэҕинэн хабыллалларын эппитин. Музыканан кыра сааһыттан дьарыктаммыт оҕо толкуйдуур дьоҕура эрдэ сайдарынан алгебра, физика, химия предметтэрин түргэнник ылынар буоларын, музыка сырдыкка, кэрэҕэ туһулуурун бэлиэтиирэ. Ытык киһибит бэйэтин үлэтинэн, сыратынан төрөөбүт Сахатын сиригэр, кини историятыгар, кэскилигэр үгүс үйэлээҕи, үчүгэйи оҥорон, үтүө өйдөбүлү норуотугар хаалларан барда. Ахтабыт-саныыбыт, сүгүрүйэбит уонна ону дьыаланан бигэргэтэбит.
Вероника Алексеева, А.В.Скрябин аатынан Покровскайдааҕы Искусство оскуолатын дириэктэрэ, СӨ култууратын үтүөлээх үлэһитэ.
