Өктөм-паарка кэрэ сиригэр нэһилиэкпит дьоно-сэргэтэ тоҕуоруһа мустан Сайылык күнүн бэлиэтээтибит. Сайыҥҥылыы сылаас күн бары биир тыынынан сайыны көрсөр сиэр-туом ыытан, аал уоту оттон, алҕаан, маанылаах хатыҥмытыгар салама ыйаан, сыттаах отунан бар дьоммутун ыраастаан сүргэбит көтөҕүлүннэ. Ол кэнниттэн тута сөрөөн кус үргээһинигэр куоталаһыы буолла. Сэттэ дьахтар эрбии тииһин курдук кииристилэр. Кыайыылааҕынан Юлиана Николаева буолла. Наҕараадатын икки куһу ылла. Бары кус үргээбиттэр биирдии куһу дьиэлэригэр илдьэ бардылар.
42 кус миинин буһарбыт Зоя Егорова бар дьонун остуолга ыҥырда. Манна дьоммутун-сэргэбитин кус миининэн, арыылаах алаадьынан, сибиэһэй собонон, убаһа тылынан, хартанан күндүлээтибит. Бары олус үөрэн, астынан, тото аһаан, араас күрэхтэһиилэргэ кыттан махтанан тарҕастылар.
Бу сайыны көрсүүгэ биһиэхэ көмөлөспүт булчуттарбытыгар Егор Филипповка, Михаил Дмитриевка, Александр Курячиҥҥа, Иван Христофоровка, Михаил Слепцовка, Данил Антоновка, Артем Петровка, Борис Христофоровка, Дмитрий Ивановка, Семен Игнатьевка барҕа махталбытын тиэрдэбит. Ону таһынан, убаһа тылынан, иһинэн хааччыйбыт Павел Ивановка, сибиэһэй собонон күндүлээбит Савелий Адамовка истиҥ иһирэх тылбытын аныыбыт. Улахан көмөнү урбаанньыт Татьяна, Николай Наумовтар оҥордулар. Ол курдук Татьяна Титовна дьүөгэлэрин кытта алаадьы, собо буһаран нэһилиэк дьонун күндүлээтилэр. Барыта сибиэһэй буоллун диэн түүннэри астаан, сарсыарда бэйэтэ аҕалан биэрэн биһигини үөртэ.
Өктөм-пааркатын салайааччыта, урбаанньыт Анатолий Прокопьев барытын бэлэмнээн, сайыммытын уруйдаан-айхаллаан көрсөр сирбитин буор босхо туран биэрбитигэр олус үөрдүбүт, долгуйдубут. М.Е.Николаев аатынан Үөрэх-билим киинин суоппара Николай Мартынов бэйэтин микроавтобуһунан саастаах дьоммутун таһан, дьиэлэригэр диэри илдьэн биэрэн дьон махталын ылыан ылла.
Дьэ маннык үтүө, амарах дьоннордоох нэһилиэк буоларбытынан олус астынныбыт, киэн туттуу долгуна дууһабытын таарыйда. Маны «норуот күүһэ-көмүөл күүһэ» диэн этэн эрдэхтэрэ биһиги өбүгэлэрбит. Өрүүтүн да маннык түмсүүлээх буолуоххайыҥ, нэһилиэкпит дьоно.
Федора Фомина, Өктөм с.