Кыыдааннаах кыһыммыт кыһарыйан кэллэ. Олоҕу—дьаһаҕы хааччыйыы тэрилтэлэрэ кыстыкка хайдах дьаһанан олороллоруй диэн Сиинэҕэ дизельнай электростанция үлэһиттэригэр тахса сырыттым.
Бу хаартыскаҕа эһиги Сиинэ төрүт олохтооҕун Василий Мамаевы көрөҕүт, дьуһуурунай-машиниһы. Барыта кэлэктиипкэ 12 киһи үлэлиир.
— Ити көрдөххө элбэх курдукпут. Дьиҥинэн, уотунан биһиги Үөдэй сэлиэнньэтин кытары хааччыйан олоробут, — диэтэ Сиинэ электростанциятын старшай машиниһа Иннокентий Самойлов, — 30 килэмиэтирдээх уот ситимин үлэтин хааччыйан олоробут. Үөдэйгэ 2 үлэһиттээхпит. Андрей Геннадьевич Петров электрикпит. Түөрт машинист дуоһунаһа көрүллэр.
— Дьэ, төһө бэлэмнээх кыһыны көрүстүгүт? «Сахаэнерго» акциялаах уопсастыба балай эмэ үлэни ыытарын истэбит. Сайын туох саҥардыы, өрөмүөн үлэтэ ыытылынна?
— Соҕурууҥҥу нэһилиэк-тэргэ, биһиэхэ үрдүкү тэрилтэбититтэн болҕомто улахан. Бастатан туран, үлэлиир усулуобуйа тэриллэр. Көрөргүт курдук, үлэлиир станциябыт дьиэтэ саҥардылынна. Саҥа технологиялар киирэллэр. Сыл аайы модельнай дизеллэри киллэрии барар, кыаҕын улаатыннарарга. Иккиһинэн, саҥа остуолбалары туруордубут, уот ситимин боробулуохата сип көрүҥҥэ уларытылынна. Үөдэйгэ тиийэр уот ситимин хонтуруолга тутабыт. Хамнас кэмигэр кэлэр. Онон тыа сиригэр үчүгэй үлэлээхпит. Кэлэктииппит бигэ. Эппиэтинэс да улахан буоллаҕа – уота суох аны олох суох.
— Үлэһиттэрин бары анал үөрэҕи барбыт дьон буоллахтара…
— Биллэн турар. Мин, холобур, сибээс техникумун урут бүтэрбитим. Сыстан үлэлиир дьоммутун үөһээ тэрилтэбит бэйэтин үөрэх киинигэр үөрэтэн үлэлииргэ көҥүл биэрэр. Эбии үөрэх эмиэ баар, технология сайдыытынан.
— Уматыгынан хааччыллан турар буоллаххыт?
— Уматык баар, олунньуга дылы туһанарбытын эрдэттэн хааччыйбыттара. Онно төбөбүт ыалдьыбат.
— Үрэх уҥуоргу ыаллары электричествонан хааччыйаҕыт? Саккырыырга дьон олорор дуо? Нэһилиэк олоҕор кыттар буоллаххыт?
— Үрэх уҥуор кыһынын биир ыал эрэ кыстыыр, уот Сиинэ нөҥүө тардыллан турар. Сайын онно уонча ыал эбиллэр. Саккырыыр урукку учаастага эстэн турар, аны онно ким да суох… Онтон Сиинэбит общественнай олоҕор кыахпытынан син кыттабыт. Кылаабынайа – уотунан хааччыйыы.
— Махтал, кэпсээниҥ иһин. Этэҥҥэ кыстыгы баҕарабыт.
Людмила Мордовская.