Альбина Лукина салайааччылаах «Эркээни иис» амарах санаалаах иистэнньэҥнэрэ анал байыаннай дьайыы кыттыылаахтарыгар, биир дойдулаахтарыгар биир күнү өрөөбөккө сыралаһан туран таҥас тигэллэр.
Покровскайга «Саргы Түһүлгэтэ» норуот айымньытын уонна култуура киинин дьиэтигэр дириэктэр Лариса Владимирова быһаччы өйөбүлүнэн кэҥэс хоско киирэннэр үлэлии олороллор. Өрөспүүбүлүкэтээҕи «Илии сылааһа» иис сыаҕын салаата «Эркээни Иис» 2023 сыллаахха тэриллибитэ. Бу үс сыл устата үлэлииллэрин тухары 100-тэн тахса биир дойдулаах уолаттарбытын таҥаһынан хааччыйбыттар. Анал мөһөөччүктээх кэмпилиэккэ 9-10 араас анал таҥас киирэр. Онон, быһа холоон аахтахха, волонтердар тыһыынча кэриҥэ таҥаһы тикпиттэр. Маны таһынан хас нэдиэлэ аайы тикпит таҥастарын Дьокуускай куоракка ыыталлар, киин куораттан инники кирбиигэ барар уолаттарга көмөлөһөллөр.
«Эркээни Иис» салайааччы Альбина Лукина ааспыт сыллаахха «Илии сылааһа” сыах иистэнньэҥнэрин кытта уон буолан Хабаровскайга, Владивостокка, быйыл саас Москваҕа бара сылдьыбыта. Онно тиийэн маастар-кылаас ыытан, госпитальга бааһыран сытар саха уолаттарыгар таҥас тигэн таҥыннарбыттара.
Биир санаанан дойдуһа өйүнэн-санаатынан үлэлэһэр дьоннорунан биэнсийэлээх Зоя Семенова, Александра Тарасова, дьиэлэригэр олорон тигээччилэр Татьяна Наумова, киин балыыһаҕа үлэлиир Маргарита Решетникова, таҥас кырыйыытын маастара Анна Тихонова, бэйэ дьарыктаах Татьяна Касьянова, тигэр уонна тикпит таҥастарын аҕаларга-илдьэргэ көмөлөһөөччүлэр киин балыыһа суоппара Сергей Шестаков, балыыһа харабыла, Альбина Лукина кэргэнэ Пантелеймон Лукин уонна Үөһээ Бэстээхтэн пенсионер Александр Козлов буолаллар. Оттон уруккута иистэнньэҥ идэлээх Наталья Афанасьева эбиэккэ дылы тустаах үлэтин үмүрүтэн баран, манна сыахха киэһээҥҥэ диэри таҥас тигэр. Кини ОДьХХ Хаҥаластааҕы филиалыгар үлэлиир, дириэктэрэ Дмитрий Николаев куруук өйүүр. Оттон Альбина Лукинаны Покровскайдааҕы Оҕо искусствотын оскуолатын дириэктэрэ Вероника Алексеева эмиэ ис сүрэҕиттэн өйүүр, көмөлөһөр. “Мындыр салайааччыларбыт бигэ тирэх буолбаттара буоллар, сатаан үлэлиэ суох этибит” дииллэр иистэнньэҥнэр, тустаах салайааччыларыгар махтаналлар.
«Охтоохтон охтума, саалаахтан самныма! Сахаҥ сирэ эрэнэр, Сахаҥ сирэ кэтэһэр!» диэн алгыс тыллаах таҥас кэмпилиэктээх мөһөөччүктэри инники кирбиигэ сылдьар буойуттарбытыгар анаан күн-күбэй ийэлэр барахсаттар күнү-дьылы аахсыбакка, соло буоллулар эрэ ис дууһаларыттан тигэллэр.
Уйбаан УЙГУУРАП,
ааптар хаартыскаҕа түһэриитэ.