Төхтүр нэһилиэгин пенсионердарын көҕүлээһининэн байыаннай дьайыыга сылдьар ыччаттарбытыгар көмөлөһөр соруктаах сүүйүүлээх лотерея-аахсыйа тэрилиннэ.
«Норуот күүһэ — көмүөл күүһэ» диэн өс хоһооно мээнэҕэ этиллибэтэх. Ол курдук бу аахсыйаҕа нэһилиэкпит биирдиилээн оҥорон таһаарааччылара, тэрилтэлэрэ, култуура үлэһиттэрэ уонна нэһилиэк олохтоохторо, Төхтүр, Өктөм маҕаһыыннара спонсордаатылар. Сүрүн бирииһи Тамара Осипова салайааччылаах «Хаксык” ТХПК олохтоото — Эркээни быйаҥнаах хочотугар көҥүлгэ көччүйэ улааппыт убаһа буутун бэлэх уунна.
Аахсыйа чэрчитинэн киирбит үбү бэрт сотору байыаннай дьайыы ыытыллар сиригэр командировкаҕа барыахтаах баһылыкпытыгар Кэскил Багдарыыҥҥа туттарыахпыт. Кини улуус дэлэгээссийэтин кытта барсан байыастарга сылаас таҥас уонна наадыйар тэриллэрин, сакаастарын Москва куораттан атыылаһыа, биир дойдулаах уолаттарбытын сирэй көрсөн туттарыа.
Алгыстаах, үтүө санаабытынан тэрийбит, Кыайыы туһугар ыытыллыбыт лотереяҕа дьоммут-сэргэбит биир санаанан үөрэ-көтө кытыннылар. Бары да араас бириискэ тиксэн, ону сэргэ дойдубут көмүскэлигэр сылдьар дьоммутугар көмөлөһөн, сэмэй кылааппытын киллэрэн астынныбыт.
Мотрена Ефремова,
Төхтүр нэһилиэгин бэтэрээннэрин сэбиэттэрин бэрэссэдээтэлэ.