#Барыбииргэ
Бүгүн Россияҕа Аҕа дойду Геройун күнэ. Биһиги оскуолабытыгар умнуллубат тэрээһин буолла. Ол курдук анал байыаннай дьайыыга сылдьан олохторун толук уурбут биир дойдулаахтарбыт, оскуола выпускниктара: Андриан Барашков уонна Николай Ермолаев сырдык кэриэстэригэр анаан бииргэ үөрэммит үөлээннээхтэрэ «Герой паартатын» оҥортороннор бэлэх ууннулар.
Тэрээһиҥҥэ хорсун буойуттар чугас дьонноро-аймахтара, төрөппүттэрэ, дьиэ кэргэттэрэ кэлэннэр барыбытын долгуттулар. 1-кы Дьөппөн нэһилиэгин баһылыга Андрей Андреевич Яковлев, улуустааҕы үөрэх управлениетын париотическай иитиигэ сүрүн испэсэлииһэ Александр Петрович Тимофеев, оскуолабыт дириэктэрэ Николай Иннокентьевич Гоголев тыл эттилэр. Кинилэр убайдарбытын сылаас- истиҥ тылларынан аҕыннылар, бу уолаттар курдук
патриот, Аҕа дойдуну көмүскүүр дьон буолан тахсарбытыгар баҕардылар.
Розалия Валентиновна Тимофеева бииргэ үөрэммиттэр ааттарыттан геройдарга анаан оҥорторбут паарталарын оскуолаҕа бэлэх уунна. Ийэлэр Арианда Егоровна Михайлова уонна Маргарита Николаевна Ермолаева харах уулаах махтал тыллара барыбыт сүрэҕин таарыйда, улаханнык долгутта.
Бу «Геройдар паарталарыгар» үөрэх бастыҥнара, араас олимпиадалар, научнай- практическай кэмпэриэнсийэ кыайыылаахтара, «Импульс» оҕо хамсааһынын актыбыыстара: Сандаара Шадрина (9 кылаас), Айсена Борисова (7 кылаас), Толя Борисов (4 кылаас), Алеша Скрябин (4 кылаас) аан бастакынан олорор чиэскэ тигистилэр.
Тэрээһин сүрүн чааһын кэнниттэн Самыртай сыһыытын биэс оскуолаларын үөрэнээччилэрин военизированнай күрэхтэрэ буолла. Күүрээннээх күрэх түмүгүнэн 2-с Дьөппөн орто оскуолатын хамаандата кыайыылааҕынан таҕыста.
Эдэркээн саастаргар төһө да бардаргын
Эн аатыҥ ааттаныа — умнуохпут суоҕа!
Дойдугун көмүскүү туруммут эр хоһуун
Геройдуу быһыыгын өрүүтүн саныахпыт…
Ярослава Лукина, П.С.Скрябин аатынан 1-кы Дьөппөн орто оскуолатын 7 кылааһын үөрэнээччитэ, Медиакиин.