Хаҥалас улууһун Кытыл Дьура сэлиэнньэтин И. П. Никифоров аатынан 5-Малдьаҕар орто оскуолатын уонна “Золотой ключик” оҕо уһуйаанын үлэһиттэрэ “Сайдыы” култуура киинигэр “Бары бииргэ” диэн анал байыаннай операцияҕа сулууспалыы сылдьар биир дойдулаахтарбытыгар анаан аһымал-кэнсиэр тэрийдибит.
Эдэр эрчимнээх дириэктэр Милена Петрова кэлэктииптэрин хамсатан, олус таһаарыылаах тэрээһин ааста. Бу кэнсиэргэ ырыа, үҥкүү эрэ буолбакка, сэрии толоонугар дьоруойдуу охтубут биир дойдулаахтарбытыгар, оскуолабыт выпускниктарыгар Александр Захаровка уонна Иван Сорокиҥҥа анаан “Герой Паартатын” аһыллыытын бүтүн нэһилиэккэ көрдөрөн дьон махтал тылын, киэн туттуутун сөҕө-махтайа иһиттибит.
Өлүөнэ эбэ кытылыгар турар Кытыл Дьураттан уопсайа 9 киһи дойдубутун көмүскүү анал байыаннай дьайыыга барбыта. Билиҥҥи күҥҥэ биһиги кыра нэһилиэкпититтэн онно хорсуннук сулууспалыы сылдьар биир дойдулаахтарбыт туһунан презентация көрдөрдүбүт, маны таһынан, оскуола, уһуйаан кэлэктииптэригэр уонна нэһилиэкпит олохтоохторугар анаан саллааттарбытыттан махтал тыллаах видеороликтары тутан үөрүүбүт муҥура суох!
Өр кэмҥэ бырааһынньык абылаҥар уйдарбатах нэһилиэк олохтоохторо, кэнсиэрпитигэр кэлэн тэҥҥэ ыллаһан, үҥкүүлэһэн, ардыгар харах уулаах, махтал тыллаах, ытыс дохсун тыаһын бэлэхтээн сынньанан, дуоһуйан бардылар диэтэхпитинэ сыыспаппыт буолуо. Эдэрдиин-кырдьаҕастыын биир киһи курдук мустан, саллааттарбытыгар күүс-көмө буоламмыт, кэнсиэрпитигэр 26 000 солк. киирдэ. Бу үбү Ханалас улууһун СВО фондатыгар ыытабыт.
Саллааттарбытыгар, биир дойдулаахтарбытыгар, туора турбакка, этэҥҥэ эргиллэн кэлэллэрин туһугар сомоҕо буолан өрүү күүс-көмө буолуоххайын!
Туйаара Васильева, Кытыл Дьура сэл.