Өктөмҥө анал байыаннай дьайыыга сылдьар биир дойдулаахтарбытыгар көмөнү хомуйар сыаллаах аһымал кэнсиэр буолла. Нэһилиэкпит, сэргэстэһэ сытар Төхтүр талааннаах ырыаһыттара, «Сардаҥа» түмсүү далбар хотуттара, Покровскайдааҕы искусство оскуолатын, Өктөмнөөҕү тыйаатыр оскуолатын уһуйааччылара, АГАТУ Өктөмнөөҕү салаатын устудьуоннара кытыннылар, Россиятааҕы устудьуоннар бэстибээллэрин лауреата Иоганн Матвеев, ырыа куттаах Владимир Прокопьев, Христофор Максимов аатыгар дэгэрэҥ ырыа күрэҕин кыайыылааҕа Николай Макаров, айар талааннаах самодеятельнай мелодист Степан Андреев ылбаҕай ырыаларынан дьону сэргэхситтилэр.
Өктөм нэһилиэгин биир тарбахха баттанар «Сардаҥа» түмсүүтэ (салайааччы Федорова А.П.) чабырҕахтаан чаҕаарда, «Морячка» үҥкүүнү толорон дьону сөхтөрдө.
Ыалдьыттарбыт Покровскай куораттан оҕо искусствотын уһуйааччылара Дарья Филимонова ырыата, саксофоҥҥа Владлена Максимова толоруута дохсун ытыс тыаһынан доҕуһуолланна. Өктөм оҕо тыйаатырын уһуйааччылара Руслан Васильев скрипкаҕа Карл Дженкинс «Палладио», Ньургустан Захаров гитараҕа Роланд Диенс «Танго» айымньыларын киһи барыта умсугуйан иһиттэ. Устудьуоннар эҕэрдэ үҥкүүлэрин, Никита Чириков, Геннадий Соломонов ырыаларын дьон куруутун кэтэһэр.
Бу тэрээһиҥҥэ, «Сардаҥа» түмсүү көҕүлээһининэн, нэһилиэк дьоно-сэргэтэ 10 харыстанар сиэккэни оҥорон туттардылар. Маннык аһымал кэнсиэрдэр нэһилиэк олохтоохорун биир тыыҥҥа киллэрэр, сомоҕолуур күүстээхтэр.
Федора Фомина, Өктөм с.