2024 сыл тохсунньу ыйыгар Покровскай куорат олохтооҕо Елена Сальченко Анал байыаннай дьайыы кыттыылаахтарыгар анаан хаххаланар сиэккэни өрүүнэн дьарыктанар өрөспүүбүлүкэтээҕи «Саха сирин бойобуой шелкопрядтара» волонтердар хамсааһыннарын филиалын тэрийбитэ. Күн бүгүн филиалга улуус киинигэр олорор ийэлэр, эбээлэр мустан байыастарга олус наадалаах сиэккэлэри өрөллөр.
- Мин биир дойдулаахтарбар, байыаннай дьайыыга кытта сылдьар уолаттарга туох эмэ көмөнү оҥорбут киһи диэн санааттан бу хаххаланар сиэккэни өрүүнү интэриэһиргээбитим. Онон Дьокуускайга «Саха сирин бойобуой шелкопрядтара» волонтердар хамсааһыннарыгар тиийэн маастар-кылааска үөрэммитим. Биллэн турар, бу биир киһи соҕотоҕун кыайбат үлэтэ. Миигин биир бастакынан ийэм, дьиэ кэргэним олуһун өйөөбүттэрэ. Бастакы матырыйаалларбын ыларбар кэргэним харчынан көмөлөспүтэ, — диэн Елена оччолорго хайдах, туохтан саҕалаабытын кэпсиир. — Билигин номнуо сүрүн састаап тэриллэн, 10-тан тахса буоламмыт ис дууһабытыттан кыһаллан үлэлии, көмөлөһө сылдьабыт. Биһиги сиэккэбит матырыйаалын куораттан хааччыйаллар, станоктарбытын Покровскай үөрэх тэрилтэлэрэ оҥорон биэрбиттэрэ. Арыллыахпытыттан үлэлиир сирбит Быр.Ксенофонтовтар уулуссаларын 44 №-дээх дьиэтигэр баар, Хаҥаластааҕы Федеральнай казначейство управлениета буор босхо биир хоһу биэрэн турар.
Елена биир санаалаахтарын кытта бу кэм устата 600-чэкэ хаххалыыр сиэккэни өрдүлэр. Бу, биллэн турар, сүүһүнэн быыһаммыт олохтор.
- Биһиги өрөр сиэккэлэрбит байыаннай дьайыыга чахчы туһалыырын байыастар билинэллэр, махтал тылларын ыыталлар. Ол биһигини инникитин да көмөлөһөргө кынаттыыр, — диир амарах сүрэхтээх волонтёр.
Хамнаһа-харчыта суох ис дууһаларыттан үлэлиир дьон үксэ биэнсийэҕэ олорор далбар хотуттар. Ый аайы усунуос хомуйан өрөспүүбүлүкэтээҕи пууҥҥа ыытабыт, анал матырыйаал ыларга кыттыһабыт дииллэр.
- Үтүө санаалаах биир дойдулаахпыт, «Ваш курьер» сулууспа салайааччыта Лэкэйик Борула биһиэхэ тэриллиэхпититтэн улаханнык көмөлөһөр. Ол курдук, бэлэм сиэккэлэрбитин, Дьокуускайтан аҕалтарар матырыйаалбытын куруук босхо илдьэр-аҕалар. Ону сэргэ, Мохсоҕоллоох бөһүөлэгин волонтердарын киэнин эмиэ таһарын билэбит. Онон киниэхэ махталбыт муҥура суох, — диэн Елена Руслановна махтана кэпсиир.
Волонтердар билигин сайыҥҥы кэмҥэ сарсыарда 11-тэн киэһэ 17 чааска диэри үлэлииллэр. Өрөбүллэригэр да таах олорботтор, дьиэлэригэр сиэккэлэрин холбууллар, тигэллэр, ону ааһан, байыастар ымыы оҥостубут Чебурашка оонньуурдарын баайаллар эбит. Хаҥалас волонтердара бу курдук сомоҕолоһоллор, туох кыалларынан үтүө дьыаланы оҥороллор, Кыайыыны уһансаллар.
Ольга Гермогенова.
Хаартыскалары, видеоны Елена Сальченко тиксэрдэ.
Волонтердарга көмөлөһүөн баҕалаахтар Покровскай куорат Быр. Ксенофонтовтар 44-гэр, 2 этээскэ 7 кабинекка тиийэн билсиҥ.