«Биир дойдулаахтарбытыгар көмүскэл, хахха буоллун…»

Кэлэр ыйга Хаҥалас улууһун дэлэгээссийэтэ төрдүс төгүлүн байыаннай дьайыы зонатыгар бараары былаанныыр. Бу туһунан улуус дьаһалтатын пресс-киинэ иһитиннэрэр.

Баһылык Олег Иринеев бэлиэтээбитинэн, дойдубут көмүскэлигэр сылдьар хорсун байыастарга болҕомто, өйөбүл туохтааҕар да наада. Онон, улуус киинигэр Покровскайга гуманитарнай көмөнү уонна тус аадырыстаах баһыылканы хомуйар пуун Орджоникидзе уулуссатын 26-гар арылынна.

Төхтүр нэһилиэгин олохтоохторо анал байыаннай дьайыыга сылдьааччыларга анаан хаххалыыр сиэккэни баайан түмүктээтилэр, номнуо ыраах айаҥҥа ыытаары бэлэмнээтилэр.

— Олохтоох дьаһалтабыт үбүлээн, Туяра Алексеева наадалаах матырыйаалы ылан аҕалан, Александр Лукин тиксэрбит муҥхатынан нэһилиэк бары тэрилтэлэрэ, аҕам саастаахтара 14 м уһуннаах харысхал сиэккэни баайан бүтэрэн баһылыкпытыгар Кэскил Ньургун уолугар туттардыбыт. «Уулаах балык быстыбат, ойуурдаах куобах охтубат, дьонноох киһи тутайбат» диэн саха өһүн хоһооно этэринии, бары көмөлөөн, үтүө санааны саҕан баайбыт сиэккэбит туһааннаах сиригэр тиийэн биир дойдулаахтарбытыгар көмүскэл, хахха буолуохтун, — диэн нэһилиэк аҕам саастаахтарын түмсүүтүн салайар, бары көмө аахсыйалар көхтөөх кыттааччылара Мотрена Ефремова кэпсээтэ.

Ольга Гермогенова.

 

 

Читайте дальше